Padayon!

Ultreya!

Usa ka pulong Espanyol nga sa Ingles ang gipasabot kay “onward’ ug sa Cebuano PADAYON. Ginabungat kini sa mga Cursillistas o sa Cursillos in Chistianity Movement isip pahinumdom nga sila nagmalahutayon isip Kristiyano; magpadayon sa pagserbisyo diha sa Simbahan.

Usa sa pamaagi nga magmalungtaron ang pagkakristiyano sa usa ka Cursillista kay agi sa panaghigalaay, paginambitay sa Kristohananong kinabuhi, mao pud kini ginatawag nga ultreya.

Ang mga Cursillistas sa Sto. Rosario Parish nagpahigayon ug PARISH ULTREYA niadtong Nobyembre 19, adlawng Dominggo sa Sucayre Compound sa Macleod, Brgy. Daliao, Toril. Panagtigum kini sa mga Cursillistas sa Sto. Rosario Parish Toril diin adunay pag-ampo ug pakig-ambitay sa Buhing Pulong sa Ginoo. Gitambungan usab kini sa uban pang mga Cursillistas sa nagkalain-laing parokya nga sakop sa Arsidyosis sa Dabaw.

Matod pa ni Bro. Lolito Boy Sucayre, Cursillo Coordinator sa maong Parokya: “Nagalaum kami uban sa panalangin sa Ginoo nga kining Parish Ultreya tambongan sa kanunay matag ikatulong Dominggo kada bulan. Tungod kay wala pay luna sa Parokya nga makahimo sa Parish Ultreya, gisugyot nga pagahimuon sa matag GKK human sa paghatag sa pagtugot sa Kura Paroko.”

Ang Parish Ultreya sa parokya sa San Alfonso Maria de Ligouri sa Mandug diin si Rev. Fr. Jemasol “Jojo” Ortiz ang Kura Paroko ug ang Spiritual Director sa Cursillo Movement matag ika-upat nga Dominggo matag bulan ug kada ulahing Biyernes sa bulan, alas 5:30-7:30 sa gabii diha sa D’ Counter sa Pelayo/Camus Sts.

Adunay ginatawag ang Cursillo Movement nga GRAND ULTREYA. Pagatambungan kini sa mga Cursillistas gikan sa nagkalain-laing parokya sa Arsidyosis ug sa uban pang diyosis. Diri sa Dabaw, mahitabo ang 60th Grand Ultreya sa Septyembre 24, 2024, kini usab isip anibersaryo sa pagsugod sa Cursillo sa dakbayan. (Leah P. Ibañez)