Mubotar Gyud!

Wala nakababag ang pangedaron ug gipamatyag sa panglawas kay nanay Dorotea Bajade Lavilla, 76 anyos uban sa iyang kapikas sa kinabuhi nga si tatay Rogociano Lirasan Lavilla, 81 anyos, mga lumulupyo sa Purok 19, Brgy. Bato, Toril, Davao City ang pag-adto sa Gasco & Centina Integrated School, aron ilang mapadayag ang ilang katungod sa pagboto sa ilang napili nga angayan ug andam muserbisyo nga politiko. Matod pa kay nanay Dorotea iya gayod nga gidasig si tatay Rogociano sa pagbotar kay sayang ang ilang boto, ug basi mao kini ang hinungdan aron makadaog ang ilang kandidato nga gisuportahan. Dugang pa niya nga wala naman sila’y katakos sa pagserbisyo sa katawhan apan aduna pa silay katakos nga musuporta sa nasod. Ug siya nanghinaot nga magmabulokon ang bugnong lugaynon karong panahona. (Lilibeth Sancover | VDLR SoCCom)