Panaw uban ni Birhen Maria

Matag bulan sa Oktubre, gisaulog sa Simbahan ang bulan sa Santos nga Rosaryo diin gidasig ang debosyon sa pag-ampo ilabina diha sa panimalay kauban ang tibuok pamilya.

Pinaagi sa “Living Rosary” niadtong Oktubre 1, 2023 gisaulog sa parokya sa Maria Mananabang sa mga Kristiyanos inubanan sa Don Bosco Dacudao Youth Council ang kalihokan mahitungod sa pag-abli sa bulan sa Santos nga Rosaryo. Ang maong aktibidad gi tambungan sa mga pangulo nga nahisakop sa maong parokya hamtong ug batan-on.

Ang mga GKK usab nga nahisakop sa parokya nagkahiusa sa pagsaulog sa bulan sa rosaryo pinaagi sa adlaw-adlawng pagrosaryo diha sa tagsa-tagsa ka mga GKK ug pinaagi usab sa pagsuroy sa mahal nga patron, Birhen Maria ug pagrosaryo sa matag balay.

Ang maong aktibidades nagpakita sa ilang debosyon sa Mahal nga Birhen Maria diha sa pagrosaryo matag adlaw isip pagdayeg, pagpasidungog, ug pagpasalamat kay Birhen Maria nga Inahan sa atong Ginoong Jesus.

Makita usab sa mga hulagway nga ang nangulo ani mao ang mga pangulo ug mga kabataan sa tagsa-tagsa ka mga GKK, inubanan sa suporta sa kura paroko nga si Rev. Fr. John Cardinal, SDB., ug kaabag nga kura paroko Rev. Fr. Ariel Arias, SDB. Dayag kaayo ug makita ang pagkalipay sa mga katawhan sa matag sakop sa mga GKK tungod luyo sa gina atubang nga problema sa panahon karon, nagpadayon kita sa atong panaw uban sa atong mahal nga Inahan, Birhen Maria ug nahatagan ang matag usa sa higayon sa pagsaulog sa tradisyon nga mao ang pagsuroy sa Birhen Maria sa matag balay ug pa- ampo sa Santos nga Rosaryo. Nalipay usab ang mga katigulangan sa mga nakita nila nga ang mga kabataan ang mangulo sa pagrosaryo.

Human sa usa ka bulan nga pagsaulog nagkatigom ang mga pangulo ug mga sakop sa parokya niadtong Oktubre 28, 2023 sa parokya isip pagsaulog sa pagtapos sa bulan sa Santos nga Rosaryo, usa sa aktibidad mao ang Bible/Holy Rosary Quiz diin gipakita sa matag contestant ang ilang kahibalo mahitungod sa Rosaryo ug sa Bibliya. Sa hapon sa adunay nahitabong paghalad ug usa ka awit pahinungod sa atong Mahal na Inahan nga mao ang “Bitoon sa Langit”, gisunod dayon ang hiniusang pag-ampo sa Santos nga Rosaryo diin ang mga misteryo sa Rosaryo gipakita pinaagi sa pag-“role play”. Gitapos ang aktibidad sa pagsaulog sa Santos nga Misa nga gipanguluhan nila Rev. Fr. Ariel Arias, SDB ug Rev. Fr. Rex Carbellido, SDB.

Ang bulan sa Oktubre giisip sa Simbahan nga Bulan sa Santos nga Rosaryo. Kini wala magpasabot nga kita paampoon sa Rosaryo sulod lamang ning bulana. Gani, gidasig man kita sa pag-ampo sa rosaryo diha sa matag adlaw. Apan, sa bulan sa Oktubre kita giawhag nga mag-ampo sa Rosaryo isip katilingban diha diha sa tagsatagsa ka kapilya o simbahan. (Arra Sumampong)