Kauban sa Madaugon

Pormal nga giablihan ang ika-upat nga hugna sa Archdiocesan Gallery of Saints niadtong Nobyembre 4, adlawng Sabado sa NCCC Mall Victoria Plaza. Nagsugod ang maong pag-abri pinaagi sa usa ka Santos nga Misa nga gipangulohan ni Most. Rev. Romulo G. Valles, DD, Arsobispo sa Dabaw duyog ni Rev. Fr. Vicente Rey Duron, SSP.

Makahuloganon kaayo ang salmo responsoryo niadtong tungora nga nag-ingon, “ang Ginoo dili mobiya sa iyang lungsod.” Tuod man kita gipadalhan sa mga santos aron sa pagdala sa atong mga pangaliya ngadto sa Dios ug sa pagbilin ug maayong sumbanan sa pagkinabuhing balaan.

Sa pamalandong nga gipaambit ni Archbishop Valles, iyang gibatbat ang tulo ka klase sa mga katawhan nga naglangkob sa atong simbahan; nauna na diri ang triumphant church nga mao ang atong mga santos, ginganlan man o wala ngatoa na sa langit. Ika-duha mao kita, nga militant church nga kada adlaw pang nakigsangka sa pwersa sa dautan ug ang ika-tulo mao ang penitent church nga kinahanglan pa sa purification.

Sa atong kanunay nga pagpaningkamot dinhi sa kalibotan dili kita angay nga mabalaka kay gani, ang Ginoo dili mubiya kanato, daghan siyag ipadala alang sa pagpahinumdom sa atong tinuod nga tinguha, mao ang mahimong mga lungsoranon sa iyang gingharian.

Ang maong Gallery of Saints nindot nga paagi sa dugang nga pagpahinumdom ug kini tatak Davao gayud. Kita sa Arkidyosis naningkamot sa pagpalapnag niini nga hitabo aron mamahimo kining kultura kanatong mga Katoliko. Daghan na sab nga mga Parokya ang nagpahigayon sa ilang Parish Gallery of Saints apil ang costume play sama sa San Lorenzo Ruiz, San Isidro Labrador sa Catalunan Grande ug ang St. Francis of Assisi sa Maa.

Sa atong paglawig dinhi sa kalibotan, kita naghandom nga makakita sa panagway sa atong magbubuhat, nadasig kita nga magmadaugon usab sama niining atong mga santos ug uhaw kita sa grasya nga makasaka sa langit.

Sa matag-adlaw atong paningkamutan ang paghingpit sa atong mga intensyon aron kita mahiusa sa atong mga sumbanan ngatua sa langit. Lumalabay lamang kita, busa atong tinguhaon nga makauli kita sa atong Amahan.