Nakakat-on na Gyud

Dear Ate Emz,

Very colorful ang akong life and wala akoy laing gina blame kon dili ang akong kaugalingon. I am now 28 years old, a single mother ug naay 2 years old nga anak. Nahinumdom ako sa akong mga ka pilyuhan kaniadto nga miresulta sa dakong responsibilidad. Nagbunga ang mga iresponsableng mga buhat tungod sa dakong kumpyansa, hiwi nga pagsalig. Mao nga akong gi angkon ang akong kasaypanan. Sangko sa langit ang pagmahay apan wala na akoy mabuhat because damage has been done. Hinoon 2 ka tuig na kadtong milabay ug akoa na nga na tul-id gamay ang mga hiwi kaniadto. Tutok na ako karon sa pagpadako sa akong anak nga sayod ako duna pa’y mas dakong hagit sa umaabot.

Kining tanan akong gi kunsidera nga mga pagsulay ug puli sa akong pagpabaya kaniadto. Pasalamat gihapon ako sa Ginoo sa iyang kamaayo ug kalooy nga gihatagan niya ako ug kusog aron kayanon kining tanan. Naningkamot ako nga dili na mausab ang mga buhat nga makapasamot sa sitwasyon ug sakto na ang akong naangkon nga pagtulun-an.

I realized nga naa gyud kita’y mga problema nga ginasagubang adlaw-adlaw ug bisan unsa nato og likay, subay gyud kini sa dalan nga atong pagalaktan. Pasalamat lang gihapon ko sa akong kasinatian tungod kay nahimo akong responsable sa mga bagay-bagay.

God bless you more.
Shai

* * * * * *

Dear Shai,

Sometimes God writes straight with crooked lines. Taliwala sa mga liko-liko, sa mga pagtipas sa atong dalan, ang kamot sa atong Ginoo kanunay lang gihapon nagagiya kanato. Bisan pa nga ang atong tawhanon nga kinabuhi daw puno sa mga kasaypanan ug mga kahuyang, mga panagsumpaki ug mga kalibog, mahimo gihapon nga makab-ot sa Ginoo ang Iyang katuyoan.

Sa pagkatinuod lang, ang kasinatian mao ang labing maayo nga magtutudlo, ug kini nagkinahanglan og dakong pagpaubos sa pagdawat sa atong mga sayop sa kinabuhi. Usahay makakat-on kita sa mga leksyon sa sakit nga paagi ug sa usa ka makapaubos kaayo nga sitwasyon, sama sa imong nasinati.

Kon unsa ka karon mao ang produkto sa imong kaugalingon nga mga desisyon o choices sa kinabuhi. Apan usahay kini nga mga desisyon moresulta sa usa ka butang nga imong mahayan sa ulahi. Ug mao na kini ang ginasulti nga “nasa huli ang pagsisisi.” Sama sa imong kasinatian, giangkon nimo nga usa ka iresponsableng buhat ang nahitabo ug dapat lang dawaton ang mga sampotanan niini. Busa, tungod niini, ang imong gipangandoy nga mga damgo wala na matuman sumala sa giplano. Kinahanglan nimong usbon ang dagan sa imong kinabuhi, ug karong panahona motutok ka sa pagpadako sa imong anak.

Sa kasamtangan, gidala nimo ang mga pagtulon-an nga imong naamgohan gikan sa kana nga sayop, ug dinhi nagsugod ang atong Ginoo sa pagsulat og tul-id sa hiwi nga dalan nga imong giagian kaniadto. Salamat sa Ginoo nga positibo nimo gitubag ang Iyang imbitasyon nga mosubay ka na sa tarong nga dalan. Bisan pa nagpaabot ka sa dugang pa nga mga hagit ug pagsulay, mas nalig-on ang imong pagtoo ug pagsalig sa Iyang gugma ug kalooy dinha sa imong paglawig aning kalibutan. Kauban sa Ginoo dinha sa imong kinabuhi, sigurado ako nga nakaangkon ka og igong kusog ug kaalam sa pagpili kung unsa ang husto, sumala sa Iyang kabubut-on.

Sa pagka tinuod lang, sama sa imong naamgohan, bisan unsa pa ang imong mga pagsulay nga likayan, kanunay man gyud ka makasagubang og mga kalisdanan, pakigbisog o kapakyasan sa kinabuhi. Bisan pa niana, taliwala niining tanan, ang atong Ginoo nagpasalig kanimo sa Iyang mga pulong nga ang Iyang grasya igo ra alang kanimo. Dugang pa niini, hinumdomi ang gisulti ni St. Padre Pio kaniadto… “pray, hope and don’t worry.”

Padayon lang sa pagpailob ug paglahutay sa pagbuntog sa mga pagsulay sa imong masinati matag adlaw. Buhata kini nga mga oportunidad, aron ikaw motubo nga mas maayong tawo, mas maayong inahan karon, ug labaw pa, kumpara sa kagahapon.

Sa laing bahin, mahimo unta nga ang imong kasinatian magsilbi nga usa ka pasidaan o pahinumdom sa mga batan-on sa ilang mga boyfriend-girlfriend relationships, that true love waits. Hinaot unta nga ang ilang mga relasyon mahimong maayo ug gitumong sa pagtabang kanila nga motubo aron mahimong mas maayong mga tawo. Ubanan sa importanteng tumong nga mao ang pag-amuma sa ilang tagsa-tagsa ka espirituhanong paglambo. Ingon niini ka mahinungdanon ngano nga ibutang gyud ang Ginoo sa sentro sa relasyon… aron sila magiyahan sa paghimo og importanteng desisyon nga mosubay sa saktong dalan ug subay sa kabubut-on sa atong Ginoo.

May our Blessed Mother, our Lady of the Way protect and guide you and your child, and lead you to her beloved Son, Jesus Christ.

God bless you more.

Ate Emz