Misteryo sa Santos nga Rosaryo: Mopalawom sa Atong Relasyon Ngadto kang Hesukristo

Malampuson nga gisaulog ang ikaduha nga kapistahan sa katilingban sa Sto. Rosario-Balinsuag niadtong Oktubre 7, 2023 uban sa tema “Santa Maria, Rayna sa Santos nga Rosaryo: Sumbanan sa Pagkapiniyalan sa Diwa sa Komunyon, Partisipasyon ug Misyon”. Mitambong sa maong selebrasyon dili lamang ang mga hingsakopan niini apan anaa usab ang mga pangulo og miyembro gikan sa mga kaubanang GKK nga sakop sa Sona Dos nga mao ang San Jose-Ipil, Sto. Niño-Balinanao, San Vicente-Balinanao, San Vicente-Crossing, Sto. Niño-Malipaga, San Isidro-Sumimao, San Roque-Comunal nga gipanguluhan ni Sis. Arlene Tarnate-Zone Coordinator.

Sa homiliya ni Rev. Fr. Ramon Jamora, iyang gipahinumdom nga ang Santos nga Rosaryo usa ka debosyon nga magpalawom sa atong pagsunod ug pag-ila sa atong Ginoo pinaagi sa pagpamalandong sa mga misteryo niini ug ang atong Inahan nga si Birhen Maria nga mao ang Rayna sa Santos nga Rosaryo adunay saad sa mga mag-ampo og Rosaryo.

Panghinaot ni Fr. Ramon nga ang atong pag-ampo sa Santos nga Rosaryo magbag-o unta sa atoang relasyon ngadto sa atong Ginoong Hesukristo. Nga sa pag-ampo nato sa Misteryo sa Kalipay, kita unta mouban usab sa kalipay. Nga sa pag-ampo nato sa Misteryo sa Kasakit, molawom unta ang atoang pagpasalamat sa atong Ginoo tungod sa kasakit nga iyang giangkon alang sa atong kaluwasan. Nga ang pag-ampo nato sa Misteryo sa Himaya, magdungag unta sa atong paglaom. Ug diha sa Misteryo sa Kahayag, kita unta malamdagan sa atong adlaw-adlaw nga pagpaningkamot sa pagsunod sa kabubut-on sa Ginoo.

Sa laing bahin, mapasalamaton ang katilingban nga gipangulohan ni Bro. Julito Crodua-PSK sa presensya ni Fr. Ramon kinsa midumala sa Santos nga Misa, sa pagtambong sa mga bisita, sa suporta ni Rev. Fr. Arnold Balaquinto-Kura Paroko og sa pagtinabangay sa mga miyembro ug pangulo nga maoy gihimong instrumento sa Ginoo aron molampos ang maong selebrasyon.

Ang bug-at nga butang mamahimong gaan kung kini dayongan. Sama sa katilingban sa Santo Rosaryo -Balinsuag kinsa nagtinabangay hinungdan sa padayon niini nga paglahutay sa paghimo og mga butang nga makapahimuot sa Dios uban sa giya ni Santa Maria.

Sa kanunay, dalaygon ang Dios. (Jozeil Crodua | SoCCom)