Usa ka katawhan naghiusa uban ni Maria

Nagmalampuson ang gipahigayong Marian Congress ug Gallery Exhibit sa St. Francis Xavier Regional Major Seminary of Mindanao niadtong Sabado Oktubre 21, 2023, agig pasidungog sa Mahal nga Inahan nga gitambongan sa daghang mga deboto, partikular niini ang kabatan-onan, mga relihiyoso, ug aktibong mga magtotoo dinhi sa Arkidyosis sa Dabaw. Ang mga pakigpulong gihatag sa mga eksperto nga sila Sr. Miriam Alejandrino, OSB, SThL ug Rev. Fr. Edilberto Mahinay, SThL.

Ang mga resource speaker naghisgut diha sa mahinungdanong dapit ni Maria sa tibuok Kasulatan ug sa iyang partisipasyon sa atong kaluwasan. Dugang pa niini, gi tagaag duso ni Fr. Mahinay nga ang nasud nga Pilipinhon gitawag sa titulo nga “El Pueblo Amante de Maria” nga sa ato pa, “Ang mga Pilipino nahigugma kaayo kang Maria”. Sa pikas bahin, ang mga partisipante sadya nga milantaw ug nagpalitrato sa mga nagkalain-laing larawan ug imahe ni Birhen Maria. Gihalad usab ang pagharana alang sa Mahal nga Inahan sa mga seminarista sa ReMaSe ug sunod niini mao ang pagampo sa Santos nga Rosaryo uban ang prosesyon nga gihimo isip kabahin sa panapos nga kalihokan.

Kining tanan misangko sa talad kan-anan sulod sa Santos nga Misa nga nagsimbolo sa atong tinuoray nga pagtoo nga Katoliko nga iyang katawhan kanunay’ng nagkahiusa sa pag-ampo ug pagtoo uban sa pangama sa Mahal nga Inahan nga magdala kanato ngadto sa iyang anak atong Ginoong Hesukristo. Santa Maria, Inahan sa Diyos, i-ampo mo kami. (Sem. Roger D. Canoy, Jr.)