Sa Sinugdan Mao Ang Pulong

Oktubre 25, 2023 – Gipahigayon ang DADITAMA Bible Workshop Seminar sa Marian Hall sulod sa parokya sa San Pablo. Ang maong workshop dunay titulo nga The Power of the Word of God. Kini gitambongan sa mga myembro sa Bible Apostolate sulod sa subregion sa DADITAMA. Ang Davao dunay 15 ka mga partisipante, Digos ug Tagum dunay tag 18 ug ang Mati ang pinakadaghan nga dunay 19 ka mga partisipante.

Dakong pasalamat sa mga nanambong nga ang maong panagtigom gihatagan sa panahon sa mga miyembro sa Episcopal Commission for the Biblical Apostolate (ECBA) nga sila si Mr. Angelito Cacal, Ms. Luningning Llarenas, Rev. Fr. Arlo Yap, SVD nga mao ang Executive Secretary sa ECBA ug labaw sa tanan mismo ang chairman nga si Most Rev. Renato Mayugba, DD. Gani, si Bishop Mayugba naghatag diha sa mga pasiunang pulong aron sa pagdasig sa mga partisipante. Matud pa niya kinahanglang mas palig-unon ang maong apostolado tungod dinhi man naggikan ang tanan. Mas maayo nga sa matag pamilya mag-una ang pagbasa, pagtuon ug paghigugma sa Bibliya. Ang matag direktor gihangyo ni Bishop Mayugba sa pagadto sa atubangan, “we come from different, regions, different backgrounds pero we are all united.”

Pagkaanindot nga pulong nga puno sa pagdasig. Gisunod pagtawag ni Bishop Mayugba ang mga coordinator sa matag dyosis ug sila nagbugkos sa ilang mga bukton, kini nga panaghiusa nagtimaan sa ilang misyon sa matag komunidad, katilingban nga ilang ginsakpan. Tuod dako dako pa ang ilang bulohaton sa pagpakusog sa apostolado apan wala sila mag-inusara.

Sulod sa maong Bible Workshop dunay upat ka session o talk nga naggikan sa ECBA team, ug una kini natapos gisaulog ang Santos nga Misa sulod sa parokya sa alas tres y medya sa hapon. Ang tanan mipauli nga dunay balon nga dugang kahibalo mahitungod sa Pulong nga mao ang atong Ginoong Dios.