Tumana ang Iyang Sugo

Diha sa kadaghan sa mga titulo sa atong mahal nga Birhen Maria, usa ra ka kamatuoran ang gipunting nianang tanan, nga si Maria, mao ang inahan sa atong Manunubos. Kini nagtudlo kanato nga pinaagi ni Maria, kita mahiduol kang Jesus, “to Jesus through Mary.” Sa atong paghigugma kay Sta. Maria, kita usab maminaw sa iyang mga gibilin kanato, una na diha, ang pag-ampo. Pag-ampo alang sa kalinaw, pag-ampo alang sa kasalbaran sa mga kalag gikan sa kalayo, pag-ampo alang sa kabag-uhan sa mga kinaiya.

Ang pag-ampo sa Santos nga Rosaryo usa gayud ka gamhanan nga hinagiban dinhi sa atong kalibotan batok sa mga espirito ug tinguhang daotan. Gani, dili lang sa mga anaa sa palibot, apan batok pud sa atong tagsatagsa ka kaugalingon, mga natisok nga dili maayong buhat diha sa atong huna-huna ug kasing-kasing.

Sa pagsaulog sa GKK Sto. Rosario Trading sa ilang ika-34 nga kapistahan, gipahinumdoman ni Rev. Fr. John Christopher Nalam gikan sa Dyosis sa Tagum nga ang atong kinabuhi muhaom sa gitudlo kanato ni Kristo. Daghan kaayong mga pagtulon-an nga nagpaingon sa duha ka sugo, ang paghigugma sa Dios ug paghigugma sa katawhan.

Ang GKK Sto. Rosario, nangandam sa daghang mga kakulian alang niining ilang kapistahan nga mgao ang nobena ug ang Santos nga Eyukaristiya. Apil sab dinhi ang ilang gitawag ug Family Night nga maoy ilang pagpakita diha sa paghigugma sa matag-usa pinaagi sa pagsalu-salo, sa pagpakig-uban. Ang tema karong tuiga mao ang, “Sto. Rosario, naglig-on kanatong, iyang mga piniyalan nga nagapanaw.”

Tuod man sa tanang higayon, ang mga miyembro sa GKK Sto. Rosario kanunay nga nagadangop kai Birhen Maria diha sa pagpaningkamot nga matuman ang mga sugo ni Hesukristo.