Hiniusang Pag-Atiman Isip Piniyalan sa Kinaiyahan

Sa pagbuhat sa Ginoong Dios sa kalibutan diha sa libro sa Genesis, human sa iyang pagpanalangin, miingon siya sa unang tawo nga mahimong magmabungahon ug magpadaghan lukop sa tibuok kalibutan. Tataw kaayo nga ang tawo adunay dakong responsibilidad sa walay hunong nga pag-atiman sa kalibutan nga atong gipuy-an gikan sa sinugdan, karon, ug hangtud sa muabotay. Sa walay hunong nga pagdako sa populasyon dinhi sa atong nasud, hinay-hinay usab nga nadaot ang natural nga kaanindot sa panagway sa gasa sa kinaiyahan diin nag-ugat sa mga dili maayong binuhatan sa katawhan.Tungod niini, miresulta sa makusog nga mga kalamidad sama na lamang sa bagyo inubanan sa baha nga nakaapekto sa atong pagpanginabuhi ug ilabina ang global warming ug climate change.

Tungod sa gisagubang nga problema sa palibot nga nagdala kanato’g dakong kabalaka, tuig 2015, mipagawas sa iyahang encyclical letter ang atong Santo Papa Francisco nga adunay titulo nga Laudato Si’ ug diin kini nasabtan nga mahitungod sa “Care for Our Common Home”. Ang maong sulat adunay mensahe alang sa tanang katawhan nga aduna kitay tawag sa pagprotekta sa atong planetang gipuy-an. Dili lamang kini hagit sa nasod Pilipinas, apan hagit kanatong tanan sulod niining kalibutana. Tungod gayod niini, nailhan ug nasabtan sa Simbahan ang dakong panginahanglanon diha sa dinaliang paghatag ug aksyon sa mga isyu, konsern, ug problema nga adunay kalambigitan sa atong palibot.

Agig tubag sa hagit sa pag-atiman sa atong kinaiyahan, hiniusang gipahigayon sa Davao Archdiocesan Youth Coordinating Apostolate (DAYCA), duyog ang Archdiocesan Bible Apostolate of Davao (ABAD) ug Archdiocesan Commission on Social Communications kaniadtong Oktubre 14, 2023 didto sa Sitio Bakong, Barangay Tawan-Tawan, Baguio District, Davao City. Tree Planting ug Tree Caring Activity ang maong aktibidad nga giapilan sa mga aktibong batan-ong lideres nga naggikan sa nagkadaiyang bikaryato nga nahisakop sa Archdiocese sa Davao nga gipangulohan inubanan sa mga director nga sila si Rev. Fr. Mark Kim Samones, DAYCA, Rev. Fr. Ritsche Gamaya, ABAD/SoCCom ug Mr. John Anthony Camangyan, DAYCA Coordinator.

Gisugdan ang maong aktibidad sa pagbendisyon sa mga tanom nga gipangulohan ni Rev. Fr. Ritsche Gamaya. Dakong kalipay ang makita sa mga mata sa batan-on ilabina nga sa ilang maayong aksyon nakatabang gayod sila sa malampusong pagtanom sa 147 ka mga seedlings diha sa riverbank. Pagkahuman, gihinluan usab sa mga partisipante ang mga seedlings nga tinanom gikan sa miaging tuig inubanan sa tabang sa mga bantay-bukid, sila ang mga tawo nga nag-atiman usab sa mga seedlings nga gitanom sulod sa mga miaging tuig. Agig pagpakita sa dakong pagpasalamat kanila, mihatag ang mga partisipante ug mga grocery packages ug adunay pagkaon nga gisalohan sa tanan.

Gipahinumdoman kita ni San Francisco de Asis nga ang atong palibot sama sa usa ka matahom nga inahan nga migakos kanato sa iyahang mga bukton. Isip mga lumulopyo sa atong komunidad, aduna kitay dakong kontribusyon diha sa pagprotekta sa atong palibot. Dili nato hikalimtan nga kita dili mabuhi kung wala ang atong kinaiyahan kay kini atong dakong tinubdan sa atong panginahanglanon. Gitawag usab kita nga mahimong mga modelo ilabina diha sa mga mata sa atong mga anak. Dili ikalimot nga ang atong aksyon ug mga desisyon makaimpluwensya gayod sa atong kinaiyahan. Maayo gayod nga aduna kitay maayong relasyon sa Ginoo, sa atong isigkatawo, ug ilabina ang pagpangga sa kinaiyahan. (Jeffrey B. Mondejar)