Dios, Kinatibuk-an sa Kinabuhi

Ika-30 nga Domingo sa Ordinaryong Panahon (October 29, 2023)
Ex 22:20-26 / Ps 18:2-3, 3-4, 47, 51 / 1 Thes 1:5-10 / Mt 22:34-40

Kon aduna kitay dili masabtan sa dagan sa atong kinabuhi kini atong dalahon diha sa atong mga pagampo. Atong ipangutana ngadto sa Dios nganong nahitabo kini sa atong kinabuhi. Ang pangutana sa usa ka Pariseo ngadto sa atong Ginoo tungod kay gusto niyang bitikon sa iyang laang ang atong Ginoo. Apan, siya wala magmalampuson sa iyang tinguha ug tuyo. Tungod niini, ang maong kahigayunan gihimo sa atong Ginoo nga larawan aron ikapadayag niya ang matuod nga kahulogan sa labing taas nga sugo sa Dios.

Ang duha ka sugo nga gihisgutan sa atong Ginoo, una, atong higugmaon ang Dios sa tibook natong kasingkasing, sa tibook natong kalag ug sa tibook natong hunahuna. Kini naghulagway nga atong higugmaon ang Dios labaw sa tanan. Ang ikaduha mao, atong higugmaon ang atong isigka-ingon sama sa paghigugma nato sa atong kaugalingon. Dinhi niining duha ka mga sugo sa Dios nagsukad ang tanang mga sugo.

Ang paghigugma sa Dios labaw sa tanan nagtimaan nga ang Dios maoy sukdanan sa tanan natong mga gibuhat, desisyon, ug pangandoy. Ang Dios ang atong giya sa pagtan-aw sa uban, aron ang atong mga hukom nahisubay kanunay sa plano ug kabubut-on sa Dios ug puno sa gugma ug dili ang atong mga tawhanong kahuyang ang magpatigbabaw sa pagtan-aw sa uban.

Apan tungod sa nasamdan natong pagkatawo kita usahay ang atong panlantaw mahugawan sa atong tawhanong kahuyang ug kini ang hinungdan nga makapasakit kita sa uban. Ang atong Ginoong Hesukristo nagpahinumdom kanato nga atong higugmaon ang atong isigka-ingon sama sa atong paghigugma sa atong kaugalingon. Kini tungod kay dili nato kalikayan usahay nga mas palabihon nato ang atong kaugalingon kaysa sa atong kaigsoonan nga nanginahanglan. Sakit man nga palandongon apan kini kamatuoran nga angay natong batonan ug matngonan aron dili kita madala sa atong mga kahuyang.

Sa katapusan, ang pagpangutana sa usaka abogado nga Pariseo ngadto sa atong Ginoo magdala kanato sa susamang kaisog sa pagpadayag usab sa atong mga kalibog ug kalisdanan ngadto sa atong Ginoo. Apan dili sa pagbitik sa atong Ginoo kon dili pagpangayo sa iyang kamatuoran ug giya aron kita makakaplag sa matuod nga kagawasan sa pagsunod sa kabubut-on Niya ug sa pagsulod sa kinabuhing walay katapusan. (Rev. Soren Abellanosa)