Panagtigum sa mga PSA ug PSAM, gipahigayon

Nagpahigayon og panagtigum ang tanang miyembro sa Pangulo sa Alagad (PSA) ug Pariosh Social Action Ministry (PSAM) niadtong Oktubre 14, 2023, sa San Francisco de Asis Parish – Tagakpan. Ang maong panagtigum gitambungan sa walo ka Parokya nga sakop sa Bikaryato sa Sacred Heart. Tumong sa maong panagtapok nga ma-reorient ang mga miyembro sa PSA ug PSAM sa ilang mga responsibilidad sa Parokya. Kini usab nga panagtigum mao ang katapusang panagtigum sa bikaryato kay ang ubang Parokya, mahimo nang miyembro sa Bikaryato sa La Purisima, ang bag-ong gimugna nga bikaryato sa Arkidayosis sa Davao.

Nakasulat sa GKK Norms and Guidelines sa Akidyosis sa Davao ang dakong responsibilidad sa mga PSA. Sila ang aktibo nga manguna sa mga aktibidades nga may kalabutan sa disaster preparedness ug quick response team, apil na usab ang pagpakaylap sa mensahe mahitungod sa hustisya ug kalinaw. Aduna usab kalambigitan sa Social Action ang responsibilidad sa mga PSA ug PSAM diha sa Parokya. Busa, dako kayo ang katungdanan nila diha sa ilang pag-alagad sa simbahan.

Matud pa ni Mercy Fernandez, PSA sa GKK Our Lady of Fatima sa Parokya sa San Miguel Marahan, nindot nga nakaapil sila sa maong panagtapok kay ila gayod nga naklaro ug napakusgan ang ilang tumong nganong nagserbisyo sila sa GKK ug Parokya isip PSA.

Pagkahuman sa talk, gisaulog dayon ang Santos nga Misa nga gipangulohan ni Fr. Leonardo “Bong” Dublan, Jr., ang Direktor sa Archdiocesan Social Action Center (ASAC) Ministry. Sa homiliya, gihatagan niya og dakong pagtagad katungdanan sa mga PSA sa Parokya, kay sila tinugyanan ug gi-piyalan sa pag-alagad dili lang sa simbahan, kon dili sa tibuok katawhan sa Dios.

Mapasalamaton ang tanan nga mga miyembro sa PSA ug PSAM tungod ani nga panagtigum kay ila pang napakusgan ang ilang tinguha nga makaserbisyo sa ilang isigkaingon. (SFDA SoCCom Team)