Anibersaryong 3 in 1

Kapin libo ka mga representante gikan sa nagkadaiyang parokya ang miduyog aron saulogon ang: Ikalim-an ug lima ka tuig sa pagtukod sa unang Gagmay’ng Kristohanong Katilingban (GKK), Ika-kap’atan ug tulo nga kasumaran sa pagtukod ug pagkahimong Diyosesis sa Tagum, ug ang Ikanapulo ug walo nga kasumaran sa Pagkunsagra Pagbalaan sa Katedral ni Kristong Hari. Kini gipahigayon atong Oktubre 11, 2023 sa Katedral ni Kristong Hari. Kini adunay Tema: Katawhan sa Dios sa Diyosesis sa Tagum: Obispo, Pari, Relihiyoso, ug Layko Nagkahiusa Pagpanaw Isip Piniyalan.

Gisugdan ang maong kasaulogan sa “Pag-entrono sa Bibliya” nga gipangulohan ni Rev. Fr. Richie M. Omas-as uban ni Rev. Janiel Arbotante, mga seminarista ug sakristan. Gipadayag ang Pahalipay nga Mensahe ni Msgr. Federico M. Mantica, nga mi-ingon, “Ang kalihokan murag recharging experience, para ma-inspired napud sa pagpangalagad.”

Ang kasaulogan nagtumong nga itudlo ug itagad sa mga tawo ang pagkamahinungdanon nga papel sa katedral, nga gipa-ambit ni Rev. Fr. Warren P. Paramio; diyosesis o partikular nga simbahan, ni Rev. Fr. Allan O. Alindajao; GKK sa kinabuhi sa katawhan sa Diyos, ni Cynthia Masinaring; ug ang Tema/Panglantaw, ni Rev. Fr. Freddie R. Barte, ang bag-ong Pastoral ug GKK Director.

Pinaagi sa paghatag og katapusang mensahe ni Bishop Medil S. Aseo, gihagit niya ang katawhan sa diyosesis nga mokat-on ug mopuyo sa pagka-piniyalan sa kinaiyahan ug sa isigkatawo isip mga igsoon diha ni Kristo.

Pagkahuman, gisundan kini og Santos nga Misa, nga gipangulohan ni Bishop Medil S. Aseo nga gi-ubanan sa daghan nga mga kaparian ug mga diakono. Human niini adunay salo-salo sa nagkadaiyang bikaryato ug one stop shop, nga gipartisipar sa mga apostolado.