Mapasalamatong Katilingban

Ang mga GSL sa GKK San Francisco de Asis sa makausa pa mapasalamaton gayud sa labaw’ng Makagagahom, sa Iyang paghatag kanamo sa Iyang panalangin uban sa among patron nga si Sr. San Francisco. Malampuson nga gisaulog ang kapistahan sa among patron uban sa pagsuporta sa mga miyembro sa katilingban.

Gikan sa GKK assembly nga maoy paghisgot sa pagplano sa mga kalihukan alang sa kasaulogan sa pista ug sinugdan sa among pagpangandam. Dinhi namugna ang tema sa ika-62 ka tuig nga kapistahan, “San Francsico de Asis sumbanan sa pagtoo’ng Katoliko diha sa pagahalad sa iyang kinabuhi, sa pagsangyaw sa maayong balita ug pagsagop sa mga kabus.” Binasi kini sa iyang kinabuhi nga inila sa iyang paghigugma sa kabus ug kamugnaan ug usab pagbiya sa iyang katigayunan ug paghalad sa iyang kaugalingon ngadto sa Dios.

Sa hataas nga panahon wala nakapahigayon og bunyagan sa panahon sa pista, kini nahimo pinaagi sa inisiyatibo sa among PSK, Ludivita Fraylon nahimo kini posible, dili mo ubos sa 37 ka mga kabataan nga ang nakadawat sa Sakramento sa Bunyag.

Sa inisiyatibo sa among PSK, nakakuha kami og mission partners alang sa among live coverage sa DXGN 89.9 Spirit FM nga mas halapad ug makaapil sa kasaulogan ang naa sa layo nga lugar nga madungog sa radyo ug sa Social Media.

Amoa gayod nga dako nga pasalamat sa among mapaubsanon ug mahigugmaon nga kura paroko nga si Reberendo Padre Allan Rodriguez sa iyang pag-uyon og paghimo sa Sakramento sa Bunyag sa mga kabataan dinhi sa among kapilya panahon sa kapistahan.

Ang mga GSL sa San Francisco mapasalamaton sa dakong suporta. Ang susi niini mao ang dakong gugma nato ngadto sa Dios. Nindot tagamtamon ang kalampusan nga puno sa kalipay nga anaa ang panalangin sa Dios.

Panalanginan kita sa Dios!