Bag-ong Blessed Sacrament Chapel

Niadtong Oktobre 5, 2023 gipanguluhan ni Arsobispo Romulo G. Valles ang pagbendisyon sa bag-ong Blessed Sacrament Chapel sa parokya sa San Pablo, Matina ning siyudad sa Davao. Si Architect Raymund Duran mao ang nagdesenyo sa maong gambalay ug iyang gibutyag nga ang maong proyekto giplanohan niadtong Septembre 2022 ug gisugdan pagtukod niadtong Desyembre 2022, ang maong gambalay inspired sa ginatawag nga Brutalist architecture ang mismong building niini ug tungod kay aduna man kini mga kahoy nga gigamit Nordic architecture inspired usab kini.

Ang mga pulong usab nga makita sulod sa maong gambalay mao ang saad sa pulong sa balaang kasulatan ug magpahinumdom kanato nga mamahimong masinugtanon sa kabubut-on sa Dios. Ang mga materyales nga gigamit sa interior design sa maong gambalay naga gikan pa sa lain-laing dapit sa atong nasud. Aduna pay angay humanon apan gamay na lamang kini sama sa landscape design. Ang maong desensyo naggikan usab sa kagustuhan sa kura paroko arun mamahimong haom usab sa mga naga bisita sa maong kapilya.

Gipamulong usab ni Arsobispo Valles nga wala man unta siya’y giandam nga hamubo nga pagpa-ambit apan tungod ang pagbasa nahaom sa maong kasaulogan, gipalawman ni Arsobispo Valles nga daghan ug wa motoo nga si Jesus anaa anang tinapay nga atong makita sulod niining kapilya, nga anaa si Jesus nga naminaw kanato, uban kanato nga gipanalanginan sulod sa Santos nga Misa. Gibutyag sa Arsobispo nga wala kita nahisakop niining kalibotana, kay didto man sa gingharian sa Dios ang atong tinuod nga puloy-anan maong muanhi ta aning kapilya arun pagampo sa Ginoo. Mapasalamaton ang Arsobispo Ilabi na sa kura paroko nga si Reberendo Padre Allan Rodriguez tungod niining balay alampuanan arun mas mapaduol ang katawhan sa Dios. Ang maong kasaulogan gitambongan sa mga staff sa parokya, mga benefactors, ug sa mga trabahante nga naghago pagtukod sa maong kapilya. Kauban usab sa Arsobispo sa maong okasyon ang atong mga bag-ong na ordinahan nga mga diyakono. Human sa pagbendisyon sa Blessed Sacrament Chapel, sunod gilayon ang pagbendisyon sa bag-ong gikahimutangan sa opisina sa parokya. (Brian Origenes)