Pagatiman sa mga Lumalangyaw

Malampusong gipahigayon ang unang Archdiocesan celebration sa National Migrants’ Sunday niadtong Septembre 24, 2023 sa Parokya sa San Isidro Labrador, Lumondao. Gitambongan kini sa mga pangulo, nagkalain-laing ministriya, ug mga giimbitahan nga mga parokyano nga adunay mga mahal sa kinabuhi nga toa karon sa laing nasod. Kini gipangulohan sa kauna-unahang Archdiocesan Team aron sa pagduso niining programa nga gipangulohan ni Rev. Fr. Dexter C.Veloso and Direktor sa Archdiocesan Commission for the Pastoral Care of Migrants and Itinerant Peoples.

Ang maong aktibidad gisugdan diha sa pagtuki sa kasaysayan sa Migrants’ Sunday nga masubay ug balik niadtong 1955 kung diin adunay sitwasyon sa kinse ka Pilipino nga miadto sa Hawaii aron magtrabaho sa usa ka plantasyon sa tubo. Gipaambit usab ang unang pagselebrar sa National Migrants’ Sunday niadtong 1986 hangtod sa pagsaulog karong tuiga sa ika-37 nga National Migrants’ Sunday ug 109th World Day of Migrants and Refugees nga adunay temang, “Free to choose whether to migrate or to stay.” Kini naghatag ug pagpaklaro mahitungod sa kung unsa ang sinugdanan sa adlaw sa mga migrante sa tibuok kalibutan.

Misunod ang mahinungdanong input nga gihatag sa resource speaker nga si Mr. Lito Abadilla nga mao ang Regional Program Coordinator for Mindanao sa CBCP-ECMI. Iyahang gituki ang Migrants Data and Action – Responses of the government offices and non-government offices diin masuta ang mga gains and pains sa mga igsuon natong mga Pilipino nga anaa sa laing nasud aron magtrabaho ug sa mga didto nagyud nagpuyo.

Iyang gibutyag ang kasagarang isyu ug problema sa mga OFWs samtang didto sila sa laing nasod nagtrabaho. Isa lamang sa iyang gipaambit ang mingaw ug lisod nga kahimtang nila didto ilabina kadtong nahitungod sa mga amo nga dili maayo kanila ug nagsupak sa ilang basic human rights. Apan, iya usab nga gipaklaro nga aduna poy mga OFWs ug domestic helpers nga maayo kaayo kanila ang ilang mga amo ug ginahatagan gyud sila sa ensaktong mga benepisyo. Iya sang gidungag ang ka bililhon sa mga suporta ug pagampo sa mga pamilya nga nahibilin diri sa Pilipinas, naa man sila sa maayo o dili maayo nga kahimtang, angay gayud nga magpakita kita sa atong mga pagsuporta kanila ug dili gayud lisod-lisoron ang ilang kahimtang kay dili sa tanang panahon ambongan silag pinansyal. Kasagaran kanila adunay mga kamingaw nga gibati ug grabeng pagpaningkamot aron naay mapadala sa mga pamilya nga naa dinhi sa Pilipinas.

Aduna usab talk show nga gipahigayon diin ang mga guest mga parokyano sa Lumondao nga nagpaambit sa ilang personal nga kasinatian didto sa laing nasod nga mao sila si Mr. Tony Espin, Mrs. Rubellyn Etdang, ug Mrs. Beberly Arellano. Tagsa-tagsa kanila nagpaambit sa ilang mga maayo ug dili maayong kasinatian. Apan ang nindot kaayo nga pagpaambit mao ang giya sa Ginoo samtang anaa sila didto sa laing nasud aron magtrabaho nga bisan paman sa kalisod, ila gayud nga nasagubang ug nakauli diri sa Pilipinas nga himsog ug luwas.

Natapos ang maong selebrasyon sa usa ka Santos nga Misa nga gipangulohan ni Most. Rev. Romulo G. Valles, D.D Arsobispo sa Davao. (Honey Kaye Etdang)