Kultura sa pakighimamat, pakigtagbo sa isigkatawo

Isip tubag sa hagit sa Santo Papa Francisco sa pagsaulog sa 48th World Communications Day, June 1, nga ang komunikasyon mag-alagad sa tiunay nga pakighimamat sa isigkatawo, gipasiugda sa Arkidiyosis sa Davao ang media awareness ug medical mission uban sa mga parokyano sa San Roque Parish, Malabog, Paquibato District.

Gipangunahan sa Social Communications Apostolate, partikularmente sa Davao Catholic Herald ang talagsaong higayon atol sa GKK Day sa maong parokya ug ikanapulo katuig nga anibersaryo sa pagkapari ni Fr. Jojo Ortiz, kura paroko.

“We are so blessed,” kini sumala ni Fr. Ortiz nga mipadayag sa iyang kalipay nga miabot ang Media Apostolate ug mga partners sa parokya bisan pa sa kalisod sa dalan nga again nga migikan sa siyudad sa sayong kaadlawon.

Mga ahensiyang pastoral nagtambayayong

 Nahitabo ang maong adlaw pinaagi sa pag-alayon ang mga pastoral agencies sa Dabaw sama sa Archdiocesan Social Action Center (ASAC) ubos sa direksiyon ni Fr. Bong Dublan nga mitunol sa ilang stock nga tambal aron iapud-apod sa mga pasyente.

Niduyog ang Davao Archdiocesan Youth Coordinating Apostolate (DAYCA) uban sa panalangin sa direktor, Fr. Jong Puerto nga mitabang sa pag-organisa sa mga padula sa mga kabatan-onan ug kabataan. Sila usab miapud-apod sa gipanghatag nga mga gamit nga personal sama sa sabon, tuwalya, napkin ug uban pa. Nanghatag usab og mga notebook, ballpen ug papel nga magamit sa eskwela.

Pinangulohan ni Erick Hernandez, ang Quick Response Team (QRT) sa San Pablo Vicariate mihatag sa first aid training ug disaster quick response sa mga kabatan-onan sa Malabog. Gipasabot sa QRT nga dapat pangandaman ang posibleng mahitabo nga landslide ug disgrasya sa motor o pagkasamad.

Ubang ahensiya nakig-alayon

 Nahimong posible ang maong medical mission tungod sa suporta sa mga partners sama sa San Pedro Hospital kansang mga doctors, pharmacists, ug kamadrehan gikuyogan gayod sa ilang administrator nga si Sr. Maria Sando, O.P.

Sa ilang gihimo nga health education, nakakat-on gikan kanila ang mga parokyano sa Malabog mahitungod sa mga sakit sama sa diabetes, high blood, cancer ug uban pa. Gipasabot usag nila sa mga nitambong ang kadaut nga dala sa pagpanigarilyo, ang importansiya sa kalimpiyo ug uban pang isyu sa panglawas.

Ang mga doctors, nurses, aides ug volunteers gikan sa San Pedro College nga gipadala ni Sr. Annabella Roña, O.P. miboluntaryo sa ilang serbisyo. Daku ang ilang tabang sa pagpahiluna sa mga pasyente ug pag-apud-apod sa mga tambal.

Mga parokyano nairog

Nairog ang mga parokyano sa ilang gihimong pagpangandam. Matod pa sa unang grupo sa mga volunteers nga natulog didto sabado pa lamang, “wala mi katulog kay saba ang kusina sa pagpangandam ug pagluto ug pagkaon sa 86 nga mga volunteers.”

Naghiusa gayod ang mga taga parokya, simbahan man o barangay lakip na ang mga military sa paghimo sa maong okasyon nga puno sa kahapsay.

Pinaagi sa gihimong radio survey, ang ilang mga GKK leaders mipasibaw sa ilang pangandoy nga maablihan ang Katolikong radyo aron sila makapaminaw og drama sa buntag, mga pagtulon-an sa gabii ug dili bastos nga mga DJ kon magsisibya.

Ang ilang mga kabatan-onan malipayon nipasayon sa mga dula alang sa mga kabataan ug mitabang sa paghatag sa mga gasa nga giandam.

Mga benefactors nitampo

Mapasalamaton ang DCHerald uban sa coordinator sa maong kalihukan nga si Cheng Vilog sa mga benefactors mga mitampo: Most Sacred Heart of Jesus sa Calinan, Our Lady of Fatima, San Pedro Cathedral, St. Francis Xavier Pre-College Seminary, Mrs. Haydee Alcazaren, ECE Marketing Corporation, Divine Mercy Claveria Community, Delongtes, Focolare Davao, Loring’s Lechon ug Mergrande.

Gisugdan sa misa ang maong kalihukan alas 7:00 buntag didto sa San Roque, Malabog ug gitapos sa panihapon didto sa Mergrande Ocean Resort alas 7:00 sa gabii. Nangandoy ang tibuok team nga mapahitabo pa pag-usab ang maong kalihukan.