Sacred Heart of Jesus Vicariate Catechetical Day 2023

Niadtong Septembre 18, 2023, ang mga parokyano sa Mary Help Of Christians Parish mainitong midawat sa pito ka mga Parokya nga nahisakop sa The Most Sacred Heart Vicariate alang sa pagsaulog sa National Catechetical Day 2023 nga gipangulohan ni Fr. John Cardinal, SDB, kura paroko. Ang tagsa-tagsa ka mga katekista sa maong bikaryato nahatagan ug higayon nga mapaambit ang ilang kaugalingon uban sa pagsaulog sa ilang adlaw nga nagsimbolo sa pagpasalamat sa ilang makanunayon nga pagserbisyo sa tanan.

Ang maong panagtigom nahimong malahutayon ingon nga kini gisugdan ug kasaulogan sa Eukaristiya nga gipangulohan ni Rev. Fr. Roy Mejias, Direktor sa John XXIII Catechetical Center. Ang kasaulogan nahimong mas makahuluganon pinaagi sa paghalad sa mga katekista sa Mary Help Of Christians Parish ug mga bulak ngadto sa unang katekista nga gihatag ni Kristo kanato nga mao ang inahan nga si Maria.

Human sa Santos nga Misa mihatag ug input si Fr. John Cardinal, SDB nga naghisgot kung unsa ang importansiya sa usa ka katekista. Sa iyang pagpaambit, iyang gisentro nga ang katekista mao ang nagbuhat sa bag-ong henerasyon sa mga Katoliko ug nga sila dili angay nga mawala o kinahanglan nga sila hatagan ug dakong bili sa katilingban. Human siya mipaambit, nakita sa tagsa-tagsa ang mga ngisi sa mga katekista sa pagsalo-salo nila sa mga pagkaon, ingon man ang pagkamanggihatagon sa mga parokyano.

Ala una sa kahapunon, mao ang ginapaabot nga takna diin ang matag parokya napokus sa daghang mga preparasyon tungod kini mao na ang ilang higayon nga mapakita kung unsa ka talentado ang mga katekista. Sama sa ginaingon, ang katekista dili lang eksperto sa pagpanudlo, ug tungod niini, sila midawat sa hagit sa pagpasundayag sa ilang mga kinaiya sa pagsayaw. Ug misunod na dayon ang mga padula nga maoy nihimo sa maong panagtigom nga mas bibo.

Niining panagtigom, gidasig ang matag katekista nga mahimong mas aktibo, ug nga dili mahimong maluyahon sa pagpangalagad. Mihatag kini ug higayon nga mahatagan og importansiya ang bili sa usa ka katekista nga maoy nahimong sinugdan sa bag-ong henerasyon sa katilingban. (Lycell Ann Batobato)