Sama ba kita sa mga saop?

Ika-27 nga Domingo sa Ordinaryong Panahon (October 8, 2023)
Is 5:1-7 / Ps 80:9, 12, 13-14, 15-16, 19-20 / Phil 4:6-9 / Matt 21:33-43

Ang Ebanghelyo ni San Mateo nagsaysay kanato mahitungod sa usa ka sambingay sa tag-iya sa ubasan ug sa daotang mga saop. Niini nga istorya, ang tag-iya sa yuta nagtanom ug ubasan, nagtukod ug paril libot niini, ug gipaabangan kini sa mga saop. Sa dihang ang tag-iya sa yuta magpadalag mga sulugoon aron sa pagkuha sa iyang bahin sa prutas, ang mga saop nagmaltratar ug nagpatay kanila. Sa kataposan, gipadala sa tag-iya sa yuta ang iyang anak, naghunahuna kini nga tahoron ug respitohon siya sa mga saop, apan gipatay usab nila siya. Si Jesus mitapos sa sambingay pinaagi sa pag-ingon nga “Ang gingharian sa Dios pagakuhaon gikan niadtong mosalikway niini ug ihatag ngadto sa uban nga mamunga.”

Kini nga sambingay mga igsoon, nagpahinumdom kanatong tanan mahitungod sa responsibilidad ug pribilehiyo sa pagdawat sa grasya ug mensahe sa Dios. Kini nag-aghat kanatong tanan sa paghuna-huna kon sa unsang paagiha kita, isip indibidwal ug isip komunidad, makabalos sa mga panalangin ug mga oportunidad nga gihatag sa Dios kanato. Diha sa atong pagkinabuhi, angay usab kita nga mangutana sa atong tagsa-tagsa ka kaugalingon: Sama ba kita sa daotang mga saop nga nagtigom ug mga panalangin, grasya, oportunidad, ug nagsalikway sa mga mensahero sa Dios? O andam ba kita sa pagila ug pagabli sa atong kasingkasing ug kaugalingon sa mga gasa nga atong nadawat ug gamiton kini alang sa kaayohan? Husto ba gayud ang atong paggamit sa mga gasa ug panalangin nga atong nadawat gikan sa Dios?

Sa atong kinabuhi, kanunay natong makita ang atong kaugalingon diha sa mga posisyon ug pribilehiyo nga atong nadawat, diha sa trabaho, komunidad, o bisan pa man diha sa atong pamilya. Ang sambingay sa ubasan nagpahinumdom ug naghagit kanatong tanan sa paghuna-huna kon maayo ba kita nga mga tinugyanan sa mga gasa ug mga oportunidad nga gipiyal nganhi kanato sa Dios. Nagpahinumdom usab kini kanato nga ang atong mga lihok adunay mga sangputanan, ug kon atong gamiton sa sayop nga pamaagi ang atong mga panalangin o isalikway ang giya sa Dios, mamahimong mawad-an kita sa mga butang nga atong gimahal ug gitinguha sa kinabuhi. Sa katapusan, kini nga sambingay nagtawag sa tagsa-tagsa sa atong kaugalingon diha sa pagpamalandong sa atong mga pagpili, pagbuhat, ug sa pagpaningkamot sa pagpamunga nga nahiuyon diha sa kabubut-on sa Dios, ug aron kita usab mahimong takus ug angayan nga mga piniyalan sa gingharian sa Diyos. (Rev. Julius Lugay)