Makaya ra ang Tanan

Dear Ate Emz,

Maayo gyud ang kada adlaw basta gani sugdan kini sa pasalamat. Pasalamat sa Ginoo niining bag-ong kinabuhi. Sa atong pagka hinanok posibleng dili na kita maka bangon pag-usab mao nga angay lang pasalamatan ug dayegon nato ang Dios. Bisan tuod nga duna kitay mga suliran nga gina atubang. Ang Ginoo sayod sa atong kapasidad ug katakos mao nga kining atong mga problema sa kinabuhi, krus nga atong gina pas-an sa kasamtangan ug musalig lamang kita sa Diyos inubanan sa pag-ampo ug buhat masulbad ra kining tanan.

Usa ako sa mga buhing saksi niini nga maka ingon ako ug tinood gayud. Akong ginapangandaman ang mga posibleng mahitabo sa akong kinabuhi.

Yes usahay maka ingon ko ug easier said than done, tinood apan kung hugot lamang ang akong pagtoo, pagsalig sa Dios makaya ra ang tanan. Ako usab ipakita sa Dios nga angayan ako pinaagi sa pagtuman sa iyang mga sugo, pagpaubos, pagdayeg sa iyang ngalan, buhat sa matarong in accordance to His will.

Usahay sa akong paglawig niining kalibutana napandol ako, nakasala, nakabuhat ug dili angayan, dili lamang ako makalimot sa pagpangayo ug kapasayloan, paghinulsol ug sin no more.

Kini mao akong mga formula sa kinabuhi, sa akong eded nga 50 anyos, minyo ug dunay 3 ka anak. Bisan tuod way katapusang problema okay lang kaya ra, basta dunay kasangga. Ang akong asawa ug labaw na ang gisaligan sa adlawng tanan, ang atong Dios Amahan.

Tungod niini makaingon ako nga bulahan kaayo kitang mga tawo tungod sa atong mapasayloong Ginoo, puno sa gugma ug mahigugmaong Amahan. Dili lamang nato kini abusohon aron kita magpuyo nga malinawon, hapsay ug puno sa grasya sa Dios.

Naghinaot ko nga kining akong formula ug kasinatian makatabang sa uban nga sama nako, nagsagubang og mga pakigbisog sa matag adlaw sa atong kinabuhi dinhi sa kalibutan.

Salamat sa higayon nga inyong mahatag aron makapaambit ko niining akong kasinatian.

Clyde

* * * * * *

Dear Clyde,

Unsa pa ang akong ikasulti human nimo malista ang mga pormula sa imong kinabuhi?

Sa pagka tinuod lang, “bawat gising, blessing”, sumala pa sa usa ka pari sa iyang homiliya. Mao nga sa imong pagmata, diha-diha dayon, kinahanglan magpasalamat gyud sa Ginoo sa gasa sa kinabuhi, sa gasa sa bag-ong adlaw. Paggahin ug panahon sa paghunong ug pagpasalamat Kaniya nga nakamata ka pa, tungod kay ang uban wala na gigasahan aning higayon. Busa, sa makausa, mahimo nimo kini isip usa ka commitment — ang pakig konektar o pakig-uban Kaniya diha sa pag-ampo sa unang mga gutlo sa imong adlaw.

Let us always remember that for each day we wake up, we come closer and closer to that moment when we meet God face to face upon the end of our earthly journey, towards our Eternal Home. To put it bluntly, we come closer to the grave! This is one reality we cannot escape but have to face!

Nag-agi lang ta dinhi sa kalibutan. Ug sa atong paglawig, daghan gyud ginasagubang nga mga hagit sa atong pagtoo…mga hagit aron sa pag-lig-on sa atong pagsalig Kaniya nga kita walay puas Niyang gi-atiman. Busa, sa atong panaw aning kalibutan, atong buhaton nga ang pagampo mahimong kabahin gyud sa atong panaw sa kinabuhi ug magdala kanato ngadto sa usa ka lig-on ug suod nga relasyon uban Kaniya. Sama nga sa usa ka kanta (I won’t let go ni Rascal Flatts), nga nagpadayag sa saad ug kasigurohan sa Dios, Iya kitang gunitan pag-ayo taliwala sa mga unos…kung makaplagan nato ang atong kaugalingon sa malisod nga mga sitwasyon, gunitan Niya ang atong mga kamot ug dili Niya kini buhian… ug makig-away Siya sa atong mga gubat alang kanato.

Hunahunaa kini…sa imong pang-edaron karon nga 50 anyos, (yes, ½ century ka na!), nakaamgo ka ba nga ang atong Ginoo nagbubo na diay og mga panalangin sa imong kinabuhi sa ingon ani nang kadugayon?…ug nagpadayon gihapon ka sa pag-ihap alang sa daghan pang mga panalangin samtang Siya midugang og mga tuig sa imong panaw niining kinabuhi? Tungod niini, unsa man ang makapugong nimo aron dili nimo himoon ang madugang pang ½ century (God willing), sa imong kinabuhi nga usa ka pagpadayag sa pasalamat alang niini nga mga panalangin?

Nanghinaot ako nga sa pagpalambo sa imong pormula sa kinabuhi, iapil nimo, labaw sa tanan, ang pagdawat sa mga sakramento ilabi na ang sakramento sa pagkumpisal ug sakramento sa Santos nga Eukaristiya, aron ma nourish sab ang imong kalag. Kung imong gi-amuma ang imong pisikal nga lawas, labaw pa ang pag-amuma sa imong espirituhanong kinabuhi. Mao kini ang mga tinubdan sa gasa sa Ginoo aron Siya maghari gyud sa imong adlaw-adlaw nga mga buhat.

Karong bulan sa Oktubre, sa pagsaulog sa bulan sa Sto. Rosaryo, naghinaut sab ako nga ang atong Mahal nga Inahan, kanunay mag-uban kanimo ug mag giya kanimo padulong ngadto sa iyang Anak nga si Hesukristo.

God bless you more.

Ate Emz