Paglawig Sa Nagkahiusang Simbahan

Malipayon ug mapasalamatong gisaulog ang ika-62 ka tuig nga kapistahan ni BIRHEN DOLOROSA niadtong Septembre 15, 2023 uban sa tema “Himoa kaming imong mga piniyalan ug ubani kami sa paglawig isip nagkahiusang simbahan.”

Nagkahiusa ang mga miyembro sa nagkalain-laing mga ministriya ug komitiba nga gipangunahan ni REV. FR. RICKY PEñALOSA, kura paroko uban sa Parish youth Ministry ug Parish Finance Committee ang pagpangandam aron magmalampuson ang mga kalihokan, ug pagpahan-ay sa mga kinahanglanon niini.

Gipahigayon ang Pilgrimage masses sugod niadtong Agosto 18, 2023 hangtud Septembre 5, 2023 sa 13 clustered zones, diin ang Birhen Dolorosa gibalhin-balhin sa matag sona aron usab makita kini sa mga miyembro ug GKK servant leaders.

Atol sa pagsaulog sa adlaw’ng natawhan ni Birhen Maria niadtong Septembre 8, 2023 nga mao usab ang ikatulong adlaw sa pagnobena, gipahigayon ang procesyon sa tanang Santo sa 59 ka GKK sa parokya sa Virgen Dolorosa nga nakasakay sa walo ka karosa nga naglangkob sa 8 ka clustered zones.

Nagmalampuson usab ang nightly cultural presentation nga gilangkuban sa lokal nga panggamhanan, Babak District Teachers, Nieves Villarica National High School, Barangay Miranda, Holy Cross of Babak ug ang pinaka highlight ang ACROBATIC show from Cebu nga usa ka fund raising event aron mapahuman ang Seminar House ug Bellfrey sa Parokya.

Gipangunahan ni Most Rev. Romulo G. Valles, D.D. ang pontifical mass sa alas 9:00 sa buntag uban sa mga kaparian sa Archdiocese of Davao. Sa pasiuna sa misa gibasa ang 7 ka kasakit ni Maria aron mahatagan ug importansiya ang kapistahan ni Birhen Dolorosa. Ang paghalad ni Jesus ngadto sa templo, ang pagkagiw ngadto sa Ehipto, ang pagkawala ni Jesus ngadto sa Jerusalem, ang panagtagbo ni Jesus ug Maria sa Kalbaryo, ang paglansang kay Jesus sa krus, Ang pagkanaog sa lawas ni Jesus sa krus ug ang paglubong kay Jesus.

Matod pa ni Archbishop sa iyang pamalandog nga isip mga Kristiyano atong ipakita ug sundon ang hiyas ni Birhen Dolorosa nga mag mainantuson ug mapagmahal nga inahan . Atong Lig-onon ang pagtoo bisan sa mga kasakit nga nasinati sa matag adlaw.

Dugang pa ni Bishop dili gyod nato kalimtan ang pagampo sa Ginoo sa panahon sa kalisod ug i-ampo pod ang ubang tawo labaw sa tanan ang katawhan sa tibook kalibutan pinaagi sa pangama ni Birhen Dolorosa.

Isip mga piniyalan ni Kristo ug magtotoo atong ipakita ang GUGMA sa Dios. Luyo sa kasakit adunay kalipay nga atong matagamtaman sa pagpuyo nining kalibutan.

Nagpasalamat usab si Archbishop Valles kay Fr. Ricky Penalosa, ug kay Fr. Jing Garcia – Parochial Vicar sa pagorganisa sa tanang kalihukan sa pista, ug sa mga proyekto nga padayon gipahimo aron mapaanindot ang balay sa Dios.

Human sa Santos nga Misa gisunod dayon ang palaro , salo-salo sa GKK servant leaders ug members, ug judging sa House of Saints. Misunod dayon pagproklama sa mga midaog sa Karosa Contest ug House of Saints nga gipangunahan sa Parish Finance Council, Parish Pastoral Team ug Parish Youth Ministry.

Mapasalamaton si REV. FR. RICKY PEñALOSA, sa tanang katawhan sa Virgen Dolorosa nga nag malampuson gayod ang ika-62 nga kapistahan inubanan sa pangama ni Birhen Dolorosa.

VIVA MARIA… VIVA BIRHEN DOLOROSA!

(Junelda A. Jauod | VDP Parish Soccom)