Debosyon sa Usa, Debosyon sa Pamilya

Sugod tuig 1975, kwarenta’y-ocho na ka tuig nga gisaulog sa pamilya Gequilan ang kapistahan o pagdebosyon sa mahal nga patron Inahan sa Kanunay’ng Panabang. Septembre 14 ang petsa sa kapistahan ug atol niini, ginaselebrar usab ang adlaw’ng natawhan sa amahan sa ilang pamilya nga si Mr. Segundino Gequilan o “Tatay Guding”. Ang pamilya membro sa GKK Immaculada Conception-Cabonbon nga sakop sa San Roque Parish-Malabog.

Kaniadto, sa nag-edad pa si Mrs. Felomina Gequilan o “Nanay Apad” og 11 anyos nagtuon na siya og pagkamananabtan sa ilang lugar. Kuhaon siya sa iyang mga silingan aron sila magampo panahon nga aduna silay abot sa uma isip pasalamat. Magluhod gayud si nanay kung mangadye kay matod pa sa nagtudlo kaniya kinahanglan nga magluhod gayud og mangadye aron sa pagsakripisyo, kasagaran sa pangadyean Inahan sa Kanunay’ng Panabang.

Sa diha nga naminyo si Nanay Apad, wala niya giwala ang pagdebosyon sa maong patron tungod kay alang kaniya kini motabang sa tawong mangayo og tabang. Daghan kaayong naagian nga mga pagsulay sa kinabuhi si nanay, usa niini sa dihang daw kamatayon na ang iyang pagpanganak pero tungod sa iyang pag-ampo sa Mahal nga Birhen naluwas ang iyang kinabuhi.

Dili tiaw nga sakripisyo ang naagian ni Nanay Apad, sa unang panahon diin 7 ka Myerkules niyang gibaktas gikan sa Buenavista, Panabo diin sila namuyo padulong sa usa ka kapilya sa 24 Bunawan, moadto lang sa milagrosong mahal nga patron Inahan sa Kanunay’ng Panabang dala usab ang iyang estampa. Tungod kay ang estampa niini mohatag og tubig bisan pa og mopahid ka og bulak manaligdig gayud ang tubig gikan sa maong estampa. Alang kanila, milagroso gayud ang maong imahe. Ilahang gisaad nga mintras may kinabuhi pa sila, dili sila mubulag sa pagdebosyon sa maong patron, dili nila biyaan ang imahe. Makita gayud ang kaabunda sa pamilya dili lang sa grasya apan puno usab sa gugma.

VIVA BIRHEN MARIA!

(Noralyn Lardo – Parish SoCCom)