Pagpangandam Isip mga Piniyalan

Gipahigayon niadtong Septembre 16 adlawng Sabado ang Leadership Training for movement base campaign alang sa mga kabantan-onan isip kabahin sa pagpangandam sa umaabot nga Barangay ug Sangguniang Kabataan Elections. Gipahigayon kining maong aktibidad sa Finster Hall sa Ateneo de Davao University Jacinto Campus. Gipangulohan kini sa Ateneo Blue vote Panata movement, sa pakig-alayon sa Archdiocesan Social Action Center Davao (ASAC), Davao Archdiocesan Youth Coordinating Apostolate (DAYCA) ug Davao Association of Catholic Schools (DACS). Sumala pa sa kanhing Director sa Ateneo Blue Vote nga Si Mr. Ramon Beleno III, ang maong grupo ang kinaunhang nakagamit sa maong hall tapos ang lockdown tuig 2020 tungod sa pandemya.

Mikabat sa setenta ka partisipante uban ang 23 ka mga kandidato sa SK ang mitambong sa maong panagtigom, nga gilangkuban sa mga kabatan-onan sa nagkadiyang parokya sama sa San Pablo Parish, Ascension of the Lord Parish, Our Lady of Miraculous Medal Parish, San Antonio de Padua Parish, Our Lady of Lourdes Parish, St. Mary’s of the Perpetual Rosary Parish, Ateneo Students.

Kining maong panagtapok wala lamang naka sentro diha sa pagka piniyalan sa umaabot nga piniliay apan kabahin usab kini diha sa pagpalambo isip mga tinugyanan sa kabatan-onan sa parokya ug sa mga nagkadaiyang katilingban. Gipahigayon kini sulod sa usa ka adlaw nga puno dili lamang sa pagpaambit sa mga speakers, apan pinaagi usab sa paghatag ug higayon nga makapaambit ang mga kabatan-onan sa ilang kahanas ug katakos sa panghunahuna. Nahuman ang maong programa nga punog kalipay sa mga kabatan-onan tungod aduna sila’y nakutlo nga mamahimong ilang mapaambit diha sa parokya ug sa matag katilingban nga ilang gigikanan. (Brian Origenes – San Pablo Parish)