Simple ug Solemne nga Paagi

Setyembre 10, 2023 – Malampusong gisaulog sa San Nicolas de Tolentino Cathedral ang ika-86 nga kapistahan niini isip pasidungog sa patron nga si San Nicolas de Tolentino, usa ka pari ug misyonero, inubanan sa tibuok banay sa mga lumulupyo sa Diyosesis sa Mati.

Gisugdan ang maong selebrasyon pinaagi sa siyam ka adlaw nga Novena Mass diin sa matag adlaw sa nobena gipahinungod sa kinabuhi ug maayong buhat ni San Nicolas. Gipahigayon usab ang mga kalihokan matag gabii kon socio-cultural presentations nga giapilan sa mga nagkalain-laing apostolado ug ministriya sa simbahan ug gikan sa mga Katolikong tulunghaan ug usab sa mga kabatan-onan sa lain-laing distrito sa ubos sa parokya ni San Nicolas.

Sa bisperas sa pyesta, gipahitabo ang prosesyon nga gipangulohan sa atong halangdong obispo, Most Rev. Abel C. Apigo, D.D. uban ang mga kaparian ug mga apostolado ug layko sa San Nicolas de Tolentino. Dugang pa niini, sigon sa kapistahan, gihatagan ug higayon ang katawhan nga makadawat sa Sakramento sa bunyag ug kumpirma.

Sa mismong adlaw sa kapistahan, usa ka Episcopal Mass ang gipahigayon diin makita ang kapuno sa simbahan sa mga deboto ni San Nicolas de Tolentino. Uban ni Bishop Apigo ang mga kaparian sa tibuok diocese nakig-uban sa maong selebrasyon. Sa iyang homiliya, gisaysay ni Bishop Apigo ang kasaysayan sa lokal nga simbahan sa Mati, gikan sa mapaubsanon nga mga sinugdanan niini hangtod sa naabot kini sa kasamtangang panahon. Gipadayag sa obispo ang iyang kalipay ug dakong pasalamat sa mga maabtik ug manggihatagong layko nga nahimong kabahin sa kalampusan sa simbahan ug matud pa niya, kining tanan grasya sa Diyos. Gitapos ang maong selebrasyon sa usa ka salo-salo ug ang naandang pagpanghatag sa bantogang “panecillos” o pan ni San Nicolas.

Sa pagsumada niini, nahimong malampuson ang selebrasyon sa kapistahan sa halangdong patron sa Mati, diin gipamatud-an nga sa simple ug solemne nga paagi, mas mapadayag ang paghandom ug pagpasalamat kang San Nicolas de Tolentino sa iyang makanunayon nga pagmahal ug pangama kanatong tanan. (Krystel Grace D. Esteban | Photos by Mati SoCCom)