Pagkapiniyalan ato bang Nasabtan?

Luyo sa mga paningkamot sa atong simbahan ilabi na dinhi sa Arkidyosis sa Davao, angay tingali natong susihon ug ato ba gyung nasabtan kining kinabuhi sa pagkapiniyalan. Matod pa sa diksyonaryo ang usa ka steward o piniyalan, maoy tinugyanan sa mga kabtangan sa usa ka agalon.

Mahinumdoman nga mas misibaw kini nga konsepto tungod sa pagkawala o pag-undang sa mga fixed rate sa pagpahigayon sa sakramento sa bunyag ug sa misa una ilubong ang minatay. Madungog sab kini sa mga drama sa atong radio diin gipasabot nga ang pagkapiniyalan usa ka pagpakita sa gugma sa matag-usa kanato ngadto sa atong Simbahan. Ang pagkawala sa mga fixed rate tuod man gikabalak-an tungod kini tabang sab sa mga panginahanglan sulod sa Parokya. Apan makita nga daghan sa mga parokyano ang nalipay sa ingon, hilabi na kadtong walay ikadalit sa panahon sa kasubo.

Subay niini nga dikreto, daghan usab ang nagpadayag nga pipila sa mga parokyano ang nagpakita sa ilang pasalamat nga mihatag diha sa mas dakong halad kung ikatandi sa kaniadtong fixed rate.

Pipila gani sa atong mga parokya, dugay nang nakasugod niining mga lakang sa pagkapiniyalan. Tingali usa ka punto nga atong nakita dinhi kadtong bahin pinansyal: nga ang matag parokyano gi-awhag diha sa pagpaambit sa ilang grasya ngadto sa uban pinaagi sa ilang paghalad matag bulan.

Hinaot nga kabalo kita nga dili lamang sa pinansyal manag-abot ang pagkapiniyalan sa usa ka tawo. Atol sa bulan sa kamugnaan, gi-awhag kita sa pagpakabana sa tanang hinimo sa Ginoo, sa matag tawo, mananap o elemento.

Makita kini nga pagpakabana diha sa atong simbahan, sa synodal nga pagpanaw, sa pag-amuma sa mga nahibilin, sa pagsabot sa panginahanglan. Gani makita kini sa umaabot nga Pastoral Visit sa atong Magbalantay sa Arkidyosis nga magsugod karong Septyembre 18 hangtod sunod tuig. Matag bisita sa kada Parokya, kamustahon sa atong arsobispo ang matag-usa hilabi na kadtong mga nangalagad sa Parokya.

Kini nga kadasig sa pag-amuma ato untang himuong sumbanan diha sa pag-alagad pod sa uban. Walay angay nga ikabalaka ang Simbahan tungod ang iyang pag-amuma balusan sa makabulohanong grasya pinaagi sab sa gugma sa mga anaa sa Parokya.

Matod pa sa panultihon, “we will never go hungry, if we choose to hunger for others.”