Dili mi managsama

Dear Ate Emz,

Tuguti ko nga makapaambit sa akong sitwasyon sa kasamtangan. 45 anyos na ko karon ug naay 5 years old nga anak.

Wala ako nakig minyo sa inahan sa akong anak tungod dunay mga rason nga akong gina konsiderar. Usa na niini ang iyang batasan. Inig masuko grabe kung mamalikas, wagas. Murag wala nakakat-on ug maayong pamatasan. Hinoon siguro tungod sa iyang ka pungot kung maglagot, pero ikatandi man gud nako ang akong kaugalingon kay dili man gud ako sama sa ingon. Mga higayon nga imbes mag-ipon tua nag laag-laag kauban ang mga barkada sa bar o kung asa man. Siyempre unsa pa man ang himoon eh di mag inom. Hinoon gawas naman ako kung unsa iyang himoon sa kinabuhi. Magpuyo ba siya sa matarong o dili. Again dili man gud ako sama sa ingon.

Kaniadto aghaton ko siya nga manimba matag adlawng Dominggo. Dili siya kay duna na daw kuno siya’y prayer time ug adlaw nga iyang igsisimba. Okay, sige mao ma’y iya.

Sa tinood lang wala man akoy pagkulang sa akong anak kay unsay panginahanglan akoa man gi provide. Mas gustohon ko pa nga anaa sa akoang puder ang akong anak aron nga matutukan ug magdako nga dunay maayong pamatasan.

Dili man ko perpekto apan sayod ako sa mga unsay angayan ug dili. Duna sab akoy mga kalapasan apan duna akoy control sa kaugalingon nga akong ika pasigarbo.

Mas masayran nato ang tinood nga color sa tawo kung anaa kita sa pagsulay, mga problema nga gina sagubang.

Dino

* * * * * *

Dear Dino,

Ang pag-ila sa tinuod nga batasan sa tawo nagkinahanglan og panahon ug lain-laing mga sitwasyon. Tungod sa makanunayon nga mga interaksyon, makaila gyud mo og maayo sa usag-usa, ug sa mas lawom pa nga lebel. Kasagaran, sa panahon nga problemado o mahagiton nga mga sitwasyon, ang tinuod nga kinaiya sa tawo mogawas gyud. Mao nga kung naa pa sa early stage nga mag-uyab, dili kini kakumpyansahan tungod kay ang ginapakita mao pa ang “best foot forward” aron dili ma reject dayon.

Nakahisgot ka nga wala ka nakigminyo sa inahan sa imong anak og ang usa ka rason mao ang iyang batasan nga kung masuko, wagas ang pagpamalikas. Dugang pa niini, imong giangkon nga ang imong kaugalingon nga kinaiya layo ra kaayo o sukwahi ra gyud sa iyang mga buhat, sama sa paglaag-laag, pagbarkada, pag-adto sa bar, inom, etc. Sa ato pa, managlahi gyud ang inyong mga pamatasan ug lifestyle. Sa kini nga sitwasyon, usa ka dako nga hagit alang kanimo ang pagadjust o pagdawat kaniya nga morag exactly opposite sa imong kaugalingon nga mga kinaiya. Sa pagkatinuod lang, kining tanan importante nga mga butang nga dapat ikonsidera kon ikaw modesisyon sa paggahin sa imong tibuok kinabuhi uban kaniya sa kaminyoon. Makaingon kita nga nakahimo ka sa husto nga desisyon bisan pa nga siya ang inahan sa imong anak.

Sa inyong kahimtang karon, subo lang kaayo hunahunaon nga ang bata ang labing nagantos sa kini nga sitwasyon kung asa siya nagpuyo sa kasamtangan. Tungod sa iyang pangedaron nga 5 anyos, magpabilin siya sa iyang inahan nga murag wala pa natagbaw sa kinabuhing lingaw-lingaw lang ug murag dili pa andam alang sa tahas ug responsibilidad sa pagkaginikanan.

Niining higayona, gusto lang nako ipunting ang imong gipadayag nga “gawas naman ako kung unsa iyang himuon sa kinabuhi. Magpuyo ba siya sa matarong o dili”. Hinuon, nakasabot ta nga kaugalingon nga desisyon sa usa ka tawo kung unsay buhaton niya sa iyang kinabuhi. Apan wala kini magpasabot nga ibaliwala na lang nato o dili mabalaka sa iyang mga sayop. Responsibilidad usab nato ang pagtul-id sa sayop sa iyang gibuhat. Matag usa kanato adunay obligasyon sa paghatag ug fraternal correction dili lamang alang sa indibidwal apan alang sa kaayohan sa tanan. Busa, dili gyud ka makasulti nga sa kinatibuk-an, wala gyud kay pakialam kung bahin sa mga sayop nga buhat sa inahan sa imong anak.

Salamat sa Ginoo tungod naa ka aron ipadayon ang responsibilidad sa pagsuporta sa mga panginahanglanon sa inyong anak isip iyang amahan. Unta dili lang sa pinansiyal ang imong pagsuporta kondili apil na ang emotional, social, psychological, etc., labi na ang spiritual nga aspeto sa pagpadaku sa inyong anak. Gitugutan ka ba nga mabisitahan nimo siya? Kung mao kini, nan, sa tanan nga paagi himoa nga ang imong oras uban kaniya usa ka oportunidad sa pagtudlo kaniya ug mga values aron magdaku siya nga mas maayong tawo nga naay maayong pamatasan. Sa ingon ani nga pamaagi imong mapun-an ang kakulangan sa iyang inahan.

Sa imong kabahin, kining imong kasamtangan nga sitwasyon usa sab sa mga pagsulay sa imong kinabuhi diin mapadayag usab kining imong tinuod nga kolor. Sa imong pagpamalandong, unsa man kini? Unsa kaha ang buot ipadangat sa atong Ginoo alang sa imong pagkatawo, sa imong pagkaamahan, sa imong pagka Kristiyano? Unsa kaha ang gusto sa Ginoo nga imong makat-unan taliwala ani nga imong kahimtang karon?

Hinaut nga kini imohang ikonsiderar nga usa ka hagit alang kanimo sa sinsero ug mapaubsanon nga pagtan-aw sa imong kaugalingon. Tingali makaplagan ra nimo ang mga tubag kung unsa ang imong mabuhat aron ang kalibutan sa inyong anak usa ka labi ka maayong puy-anan. Kalabot niini, walay laing paagi kondili ihiusa ang imong kaugalingon kang Jesus diha sa pagampo tungod kay kini lamang ang imong kusog ug ang Ginoo lamang ang imong dalangpanan.

Hinaot nga ang atong Ginoo, uban ni Mama Mary, kanunay magauban kanimo sa matag gutlo sa imong kinabuhi.

God bless you more.

Ate Emz