Pag-ayo pinaagi sa paghangop

Ika-23 nga Domingo sa Ordinaryong Panahon (September 10, 2023)
Ez 33:7-9 / Ps 95:1-2, 6-7, 8-9 / Rom 13:8-10 / Mt. 18:15-20

Mga igsoon niining ika-kawhaag tulo nga Dominggo sulod sa Ordinaryo nga panahon, ang atong mga pagbasa ilabina ang Ebanghelyo nga gisaysay kanato ni San Mateo naghatag kanato og kaalam ug nagagiya kanato arun kita mahiusa diha kang Kristo. Nasaksihan usab nato nga si Jesus mipaambit og mga praktikal nga pagtulun-an bahin sa atong espirituwal nga mga panlantaw nga adunay kalabutan sa atong inadlaw-adlaw nga kinabuhi. Sa atong pamalandong aduna kitay tulo ka mga punto bahin niing Ebanghelyo karun.

Una, Ang Relasyon nga adunay pag-amuma sa uban. Gilig-on ug gi-awhag kita ni Jesus nga ayohon ang mga nabungkag nga relasyon diha sa atong isigkatawo. Sa dihang adunay mga pagkabingkil-bingkil nga nahitabo giawhag kita nga atubangon ug sulbaron kini pinaagi sa pagpinasayloay. Kini nga pamaagi nagtahum sa atong dignidad ug nagahatag og higayon alang sa pagsinabtanay. Gipakita niini ang kabilihon sa pag-ugmad sa usa ka malinawong relasyon diha sa matag-usa ug sa Diyos.

Ikaduha, Ang panaghiusa. Si Jesus nagrepresentar sa mga desisyon nga gidasig sa kahiusahan ug mga buhat sa Diyos. Ang pagkahiusa dili lamang bahin sa pagtuman niini sa usa ka butang, kundili kini usa ka harmoniyosong pagpahatag sa kaugalingon ug pagpuyo sa tinuoray nga pagtoo. Dugang pa niini, si Jesus nag-ampo kanato nga bisan usa ka gamay nga grupo nga magkatigom sa iyang ngalan, ang iyang presensya anaa uban kanato. Kini nagpamatuod nga kon magkahiusa kita uban ang atong pagtuo sa Diyos, ang atong kaangayan maoy magdala kanato sa atong koneksyon diha sa atong labaw nga makagagahum.

Ikatulo, Ang Pag-ampo makapahiusa kanatong tanan. Ang pag-ampo usa ka kusog nga gihatagan og dakong bili ni Jesus diha sa iyang pagpanudlo. Iyang gipaklaro ang ka-importansya sa pag-ampo, kung diin iyang gihiusa ang mga kasingkasing sa pagpangita sa kabubut-on sa Diyos. Kini nga pag-ampo dili lamang bahin sa mga pagpangayo kundili, kini ang mohulma sa atong mga kasing-kasing ug kaugalingon diha sa atong mga tinguha ug relsyon sa Diyos.

Sa Katapusan, diha sa ebanghelo ni San Mateo, nagtanyag kini og praktikal nga mga panlantaw alang sa pagkahiusa sa relasyon, pag-amuma sa matag-usa, ug pagsalmot sa pag-ampo nga naghatag kanato og pagsinabtanay diha sa atong kinabuhi. Pinaagi sa pagtuman niini nga mga tudlo sa atong Ginoo, atong gisulbad ang kinaiya sa pagkabulagbulag, walay pagkasinabtanay, ug walay hiniusang pagtoo diha sa Diyos. Ang pag-ampo nga nagkahiusa naghatag kanato og usa ka mas malig-on ug mas mahinungdanong komunidad, pakigrelasyon diha sa uban, ug labaw sa tanan pakigrelasyon diha sa Diyos.