“Kristohanong Pormasyon, Pundasyon sa Pag-alagad nga Diosnon”

“Kristohanong Pormasyon, Pundasyon sa Pag-alagad nga Diosnon”. Mao kini ang tema nga gipamalandongan sa mga sakop sa Extraordinary Ministers of Holy Communion (EMHC) sa San Miguel Parish, Panacan nga malampusong nagpahigayon sa ilahang 5 Basic Refresher Course nga nahitabo niadtong Agosto 21, 2023, adlawng Lunes didto sa Seminar Hall 2 sa Parokya. Kini tubag sa mga sakop sa EMHC sa sugyot sa ilang Kura Paruko nga si Rev. Fr. Mervin George Maglana, DCD nga kinahanglan makapahigayon og Refresher Course sa 5 Basic Seminars tungod kay pipila na ka katuigan ang milabay human sila nakatambong niini.

Gisugdan ang maong kalihukan sa Santos nga Misa sa alas 6 sa buntag diin gipasidunggan usab ang ilang patron nga si San Tarsicius duyog sa ilang pagsaulog sa ika-2 ka tuig nga kapistahan sa maong grupo. Ang naasoy nga 5 Basic Refresher Course naglaraw sa pag-umol sa mga sakop sa EMHC kinsa nahimo na nga kabahin sa maong grupo sulod sa pila na ka mga katuigan ang milabay. Kini nakahatag og dugang pa nga kahibalo alang sa mga sakop sa grupo nga ilang magamit sa ilang pagpadayon sa pagpangalagad isip mga sakop sa EMHC. (Warren Rex M. Bautista | Chairman, EMHC San Miguel Parish)