Pinoy Fiesta

Mabulokon nga gisaulog sa San Roque Parish-Malabog ang ika-trenta y nwebe nga kapistahan niadtong Agosto 16, 2023 diin mibisita ang pipila ka mga pari sa Archdiocese of Davao uban ni Most. Rev. Romulo G. Valles, D.D kinsa nangulo sa Pontifical Mass.

Nagkadaiyang lechon, purok contest, display sa lain-laing mga gulay, prutas ug uban pang mga pagkaon ug ang baga nga panon sa mga manimbahay nga nanindog sulod sa kapin oras, mao ang pipila sa mga larawan nga imong masaksihan niadtong taknaa.

“Nagsinumbagay ang bingka, ang suman, ang pan, ang pandesal, ang sikwati, ang kape, ang lechon nga halang…”, komento sa Arsobispo sanglit kung mobisita ka sa luyong bahin sa Parokya, Pinoy kaayo ang istilo niini kay anaa man ang mga pagkaon nga para pamahaw, meryenda ngadto na sa paniudto nga giandam sa Parish and Kusina Staff og mga parokyano nga gigahin alang sa tanan.

Mapasalamaton si Rev. Fr. Arnold Balaquinto-Kura Paroko, sa tanang mga matinabangong kamot nga kinasaing-kasing nga mihatag sa ilang panahon alang sa paghan-ay sa mga programa sa tibuok selebrasyon og ingon man usab sa mga bisita gikan sa nagkadaiyang dapit kinsa migahin og oras sa pagsalmot sa kapistahan.

Sa laing bahin, susama sa tradisyonal nga pista, anaa ang banda gikan sa Sona 7 nga gipangunahan ni Bro. Cirilo Capunong Buagas usa ka maestrong parokyano, sila mihalad og awit nga milingaw sa katawhan taliwala sa ulan.

Libre usab nga gipanghatag sa mga parokyano ngadto sa mga bisita ang hinikyad nga mga gulay og prutas sa mga tagsa-tagsa ka purok sa matag sona og kini nagpamatuod nga gikuptan og gihangop gayud nila ang tema sa kapistahan nga nagkanayon “Sr. San Roque: Sumbanan sa Tiunay nga Pagka-Piniyalan sa Diwa sa Komunyon, Partisipasyon ug Misyon.”

Uban sa pangama ni Sr. San Roque, mabulokon nga gisaluog sa parokya ang maong kapistahan gamit ang istilo sa Pinoy, kini selebrasyon sa pagpasalamat sa dugang na usab nga katuigan nga puno sa grasya og pagtulon-an gikan sa Kahitas-an.

Sa kanunay, dalaygon ang Diyos. (Jozeil Comapas Crodua | Photos by Jemboy Omboy and Judeylyn Crodua)