Director’s Message: Pagmatinud-anon

Nga Isigkatawo

“Unsaon man nato pagmatuod nga mahimong isigkatawo diha sa atong paggamit sa media sa komunikasyon niining kalibutan sa digital technology?”

Dinasig sa tema sa ika-48 nga Kalibutanong Adlaw sa Komunikasyon, “Komunikasyon Nga Nag-alagad Sa Tinuoray Nga Kultura Sa Pakighimamat”,  ang atong Santo Papa, Francisco, nakakaplag og tubag niining maong pangutana diha sa sambingay mahitungod sa maayong Samaryanhon.

Alang sa mahal natong Santo Papa, ang komunikasyon mao ang pagkahimong matuod nga isigkatawo, ang pagka-responsible ngadto sa isigkaingon. Kini nagpasabot sa “katakus sa paghimo sa akong kaugalingon nga mahisama sa uban. Ang kahulugan sa komunikasyon mao gayod ang pagka-amgo  nga kitang tanan mga tawo nga linalang, mga anak sa Dios. Buot nakong makita nga kining maong gahum sa komunikasyon karon mahitabo diha sa pagpakamatinuad-anon nga isigkatawo.”

Dili angayan nga tumong sa komunikasyon ang pagpakaylap sa pag-gamitay ug pagpanlupig sa isigkatawo. Hinunoa, angay kining pahimuslan uban sa maampingon nga pag-atiman ug kaluoy ngadto sa isig-kaingon. “Gitawag kita sa pagpakita nga ang Simbahan panimaly alang kanatong tanan.”

Kulang ang pag-angkon nga kita mga higala pinaagi sa internet o FB. Gikinahanglang matandog ang atong kaugalingon mismo aron makab-ot ang kultura sa pakighimamat. “Ang personal nga pagpakiglambigit maoy basihanan sa pagkamasaligan sa nagkomunikar.” Mao nga gibalik-balik gyud ni Papa Francisco nga gikinahanglan nato ang pagpakiglambigit ngadto sa mga kabus diha sa kadalanan.

Matud ni Papa Francisco: “Sa akong nakita, kung papilion ako sa Simbahang samaran nga naga-adto sa kadalanan ug sa Simbahan nga gihasol sa pagtagad lamang sa kaugalingon, pilion gayod nako ang una. Kining mga dalana mao ang kalibutan diin ang katawhan nagpuyo ug diin sila atong maabot sa paaging epektibo ug puno sa pagbati. Ang digital nga dalan usa niini, ang dalan diin nagpunsisok ang katawhan nga nagpadayag sa kasakit sa matag-usa, katawhan nga nangandoy sa kaluwasan ug paglaum. Pinaagi sa internet, ang Kristohanong mensahe ‘makaabot sa tibuok kalibutan’(Buhat 1:8).”

Busa kitang tanan gidapit sa pagtandog sa atong isigkatawo pinaagi sa mga instrumento sa media, sa pagpalalom sa atong relasyon sa matag-usa, sa tinuoray ug personal nga pakighimamat.  “Dili paigo nga kita molabay lamang sa digital nga dalan aron kita dunay koneksyon sa uban; ang koneksyon nato sa uban kinahanglang motubo ngadto sa tiunay nga pakighimamat. Dili kita mahimong mahimulag sa matag-usa sinirad-an  sa atong kaugalingon. Kinahanglan kitang mahigugma ug higugmaon. Kinahanglan kita nga mahimong malumo sa isigkaingon.”