Simbolo sa Kadaugan

Nagmalampuson ang pagsaulog sa ika-43 nga Kapistahan sa Santa Cruz Mangal-al niadtong Hulyo 12, 2023 sa alas dyes sa buntag diin gisugdan ang Santos nga Misa, uban sa Tema: “Viva! Santa Cruz, gugma ug kaluwasan, gasa gikan sa Dios alang sa Tanan.” Ang Santa Cruz nagsimbolo sa atong pagtoo ug sa kadaugan ni Kristo. Gipadayag sa atong Dios Amahan ang Iyang dakong paghigugma sa kalibotan nga walay sukod og pinaagi niini naangkon nato ang maong kaluwasan nga gisaad sa Dios kanato. Sa homiliya ni Fr. Arnold iyang gipahinumdoman ang katawhan kung unsa kabililhon ang krus kanato kay ang krus nga atong gipas-an, nagapahinudom kanato nga kabahin kita sa maong krus ni Kristo og mahimo kining gaan kon makanunayon kita nga modangop sa Ginoo pinaagi sa makanunayon nga pag-ampo.

Niining adlawa usab gisaulog sa ni Fr. Arnold ang iyang ika-16 nga anibersaryo sa gasa sa bokasyon sa pagkapari, mapasalamaton ang tanan nga nanimba tungod sa gasa sa Pagkamatinud-anon, Pagkamaamomahon, Pagkamahigugmaon og Pagkamaalagaron sa tiunay diha sa katawhan diin siya nahimong maayong Piniyalan sa Parokya sa San Roque Malabog .

Mapasalamaton si Sis Josephine Balunos PSK sa maong GKK sa tanang miyembro ug GSL sakop sa Sona 9 ilabina kay Fr. Arnold diin mapagarbohon sila nga nakauban sa iyang anibersaryo.

Viva Santa Cruz! Sa kanunay Dalaygon ang Dios.

(Arlene Tarnate/Delia Batolanon – SocCom)