Ang Pagpasaka sa Langit sa Mahal nga Birhen Maria

Si Papa Pio XII, nideklara sa “Dogma of the Assumption” niadtong Nobyembre 1, 1950. Kini nagpasabot nga si Birhen Maria, human sa iyang kinabuhi dinhi sa yuta gipasaka sa langit lawas ug kalag. Nga sa ato pa, wala madugta ang iyang lawas sama sa lawas ni Jesus. Kini usa ka kamatuoran nga gisangyaw sa Simbahann ug atong gituohan. Ang maong kamatuoran nga si Maria gipasaka sa langit, lawas ug kalag walay direktamenti nga nasulat diha sa Bibliya apan kining maong kamatuoran nagasukad ug naka basi diha sa Balaang Kasulatan nga mao ang Bibliya.

Diha sa Ebanghelyo ni San Lucas 1:28, diin ang Mahal nga Birhen Maria gipanalanginan pag-ayo sa Ginoo mao nga siya napuno sa grasya. Tungod niini wala siyay buling o mansa sa sala kay puno man siya sa grasya, mao nga human sa iyang kinabuhi dinhi sa yuta, ang iyang lawas na preserbar sa linugdangan sa sala nga mao ang pagkadugta sa lawas ug ang pagkalangan o pagka-“postpone” sa pagdawat sa kalipay’ng langitnon hangtud sa katapusang adlaw. Human sa iyang kinabuhi dinhi sa yuta gipasaka siya sa langit, lawas ug kalag.

Diha sa Ebanghelyo ni San lucas 1:32:43, Kini nagmatood nga si Birhen Maria, inahan sa Dios. Ang lawas ni Jesus nag gikan sa lawas ni Maria. Ang lawas ni Maria gipreserbar gikan sa sala alang niining maong misyon sa pagka-inahan sa Dios. Busa angayan lamang nga ang iyang lawas dili madunot human sa kamatayon sama sa lawas sa iyang anak. Si Maria usab adunay dakung bahin o kalambigitan sa makalawasnong buhat ni Jesus dinhi sa kalibutan. Busa angayan lamang nga mahiusa usab siya sa lawasnong kahimayaan sa iyang anak didto sa langit.

Ang lintunganay niining tanan mao nga ang pagpasaka sa Mahal nga Birhen Maria usa ka dakong gasa dili lamang ngadto kang Birhen Maria kon dili usa kini ka langitnong gasa alang kanatong tanan. Tungod kay kini nagpahinumdom kanato sa kaayo sa Ginoo, sa iyang gitagana kanato nga mao ang kinabuhing dayon. Sama sa giingon ni San Pablo sa iyang sulat ngadto sa taga-Roma: “Inig katun-as na sa atong puloy-anan niining kalibutana nga mao ang atong lawas, hatagan kita sa Ginoo og puloy-anan didto sa langit, puloy-anan nga wala nay katapusan ug siya gayod ang nagbuhat…”

Kita gihatagan sa Ginoo og kasigurohan sa umaabot nga kinabuhi. Diha sa panig-ingnan ni Birhen Maria kita gidasig sa pagsunod kaniya aron maangkon nato ang kasigurohan sa kinabuhing dayon uban kaniya. Ang atong gipangandoy nga kinabuhing dayon karon maangkon na sa Mahal nga Birhen Maria. Busa angay gayod kitang magmadasigon sa pagpaningkamot sa pagsunod sa mga panig-ingnan sa atong Mahal nga Inahan.

Ang makatabang aron makasunod sa panig-ingnan sa Mahal nga Birhen Maria, mao ang atong pagdebosyon ngadto kaniya. Adunay ginaingon. “A TRUE DEVOTION WILL LEAD US INTO AN IMITATION OF THE LIFE OF THE SAINT.” Ang tinuod nga debosyon magdala kanato ngadto sa pagsunod sa kinabuhi sa maong santos diin kita adunay debosyon. Kon kita adunay kinasingkasing nga pagtahod, pagsangpit ug pangayo og panabang ngadto kang Birhen Maria dili gayod kita niya pasagdan. Kita iya gayod nga patalinghugan. Ato kanunay’ng hinumdoman nga siya dili lang Inahan ni Jesus, siya usab atong Inahan. Siya ang inahan nga puno sa kalooy, inahan sa kanunay’ng panabang.

STA. MARIA. I-AMPO MO KAMI!

(Rev. Fr. Johny Autida)