Kusina sa Parokya, Kinasing-Kasing nga Miamuma

“Salamat Ante, Angkol, Kuya ug Ate”, mga pulong madungog sa mga partisipante sa Summer Youth Camp 2023 sa Parokya sa San Roque Malabog.

Uban sa matam-is nga ngisi, kinasing-kasing nga gipadayag sa mga batan-on ang ilang tiunay nga pagpasalamat sa mga staff sa kusina sa Parokya nga gipangulohan ni Kuya Weng ug Ate Gina. Kini tungod sa pag-amuma nga ilang nabati gikan sa mga staff pinaagi sa pag-atiman kanila sulod sa tulo ka adlaw.

Sa pagsugod pa lamang sa programa, anaa ang mga staff nga abli ang kasing-kasing sa pagtubag sa mga panginahanglanon sa batan-on. Gikan sa mga kape pagka kadlawon, pamahaw, meryenda, paniudto og panihapon- kini giandam sa mga staff aron idalit sa batan-on.

“Salamat Ante, Angkol, Kuya ug Ate”, pulong nga nipahilak sa mga taga Kusina. Hilak nga bunga sa kalipay kay luyo sa ilang hilom og mapaubsanon nga pagtahan sa ilang kaugalingon, nakita ug gitagaan diay og bili sa batan-on ang ilang pagpakabana ug kini nagpasabot lamang nga mas labaw kini nga nakita sa Dios.

Kini nga mensahe usa sa perpekto nga larawan sa Sinodong Simbahan. Diin anaa ang diwa sa pagtinabangay ug pagpadayag sa gugma sa matag-usa.

Sa kanunay, Dalaygon ang Dios.

(Jozeil Crodua)