Mga Bag-ong Kura Sa Mati Gitudlo

MATI CITY –   Ang ika-32 nga kapistahan ni San Isidro Labrador parish sa Banaybanay, Davao Oriental nga kasamtangang gidumalahan ni Fr. Carlos Baquial, niadtong Mayo 19, 2014, nahimo usab nga higayon sa pagpahibalo sa mga bag-ong assignment sa pipila ka kaparian – isip kura paroko, parochial vicar, ug apostolate director nga mahimong epektibo karong June 1, 2014. Busa presente halos tanang sakop sa diocesan clergy sa maong mabulokon usab nga kasaulogan sa fiesta patronal sa Banaybanay kon diin nasaksihan pod ang pagbendita sa bag-ong bell tower ug ubang mga bahin sa usa sa labing dakong mga simbahan sa Diyosesis sa Mati.

Base sa gibasa ni Diocesan Chancellor Fr. Bienvenido Bersosa nga mga appointment letters pinirmahan ni Bishop Patricio Alo, kini ang mga kabag-ohan sa apektadong mga parokya:

Sa San Nicolas de Tolentino Cathedral Parish – ang bag-ong kura paroko mao si Fr. Edito Bano, ug mga parochial vicars sila si Fr. Samuel Bronola ug Fr. Enrique Dongiapon;

Sa San Vicente Ferrer, Lupon- parish priest si Fr. Ricardo Siblos ug parochial vicar si Fr. Jacinto Ortiza samtang nagpabilin didto ang laing assistant, si Fr. Ronnie Orellanida;

Sa San Francisco Xavier, Sigaboy/Gov. Generoso, si Fr. Joel Sayson ang kura paroko ug duha ang parochial vicars nga sila si Fr. Roland Sayman ug Fr. Bienvenido Bersosa;

Sa St. James the Apostle parish sa Cateel, si Fr. George Cajes Jr. ang parish priest nga mipuli kang Fr. Nestor Morata kinsa gibalhin ngadto sa San Ignacio de Loyola parish, Manay;

Ang kanhi kura sa San Ignacio, Manay, si Fr. Bernard Albao ang gi-assign isip  parish administrator sa Divine Mercy Shrine & parish sa Mati City, kauban si Fr. Orveille Andrade;

Sa San Ignacio de Loyola, Luzon, gibutang si Fr. Perfecto Urbuda isip kura paroko kauban si Fr. Mario Jimenez; samtang gipalugwayan og usa ka tuig ang tagal sa pagka-kura paroko nila ni: Fr. Medardo Salomea sa San Pedro Claver parish sa Tarragona ug ni Fr. Joselito Basilad sa Birhen de Guia sa Dawan, Mati City.

Gipahibalo usab ang pagkabalhin ngadto sa laing mga parokya isip parochial vicars sa mosunod:

1- Fr. Alonito Tinong ngadto sa San Isidro Labrador parish, Batobato;  2-Fr. Manuel Trocio sa San Francisco Javier, Manay;  3-Fr. Rey Armasa sa Baganga; ug  4-Fr. Albert Silagan sa San Isidro Labrador, Banaybanay.    Ang bag-ong Chancellor nga kasamtangan usab Judicial Vicar mao na si Fr. Pedrito Mapayo, ang Clergy House in-charge.

Ghiinganlan usab ang usa ka Assistant Pastoral Director ug 13 ka mga Diocesan Directors sa managlahing mga organisadong pundok sa mga laiko sa simbahan—apostolate, movement, association, way.