Revisitation of Yellow Book

Adunay revisitation and intensification sa implementasyon sa GKK norms and guidelines (yellow book) sulod sa Arsidyosis sa Davao nga gipahigayon niadtong Hulyo 18, 2023 sa St. Mary of the Perpetual Rosary Parish, Buhangin, Davao City sulod sa tulo ka oras gikan ala sais sa gabii hangtod sa alas nuebe sa gabii. Ang maong activity gipasiugdahan sa Archdiocesan BEC/GKK Director, Rev. Fr. Pedro Lamata ug BEC/GKK Pastoral Lay Coordinator, Victoria Anghag.

Gisugdan kini sa pag-ampo nga gipangulohan ni Sis. Anita Balio ug misunod ang pagpaila-ila sa mga partisipante sa mga nagkalain-laing ministriya sa parokya, PPC team kauban ang kura paroko nga si Rev. Fr. Dionisio Tabiliran, PSK Zone Coordinators, Formation team ug Worship team.

Gisunod ang pag-presenta sa content sa yellow book kauban ang mga obserbasyon nga gibasa sa Parish PSK Coordinator nga si Arsenia Barimbao. Siyam na ka tuig ang pagimplementar sa maong GKK norms and guidelines sugod niadtong tuig 2014, diin tungod sa kadugayon, angayan na kini nga e-review ang mga nakalatid sa maong yellow book. Pagkahuman sa presentasyon gituki ang mga obserbasyon nga na tapok sa matag ministriya sa Parokya kung na implementar ba kini o wala. Gihimo ang mga interaksyon ug mga pangutana gikan sa mga partisipante. Gidasig sa facilitator, Ms. Vicky ang matag partisipante sa pagsulti ilabina ang mga PSK diin sila gayud ang nangulo sa katilingban.

Usa sa gi-review diha sa yellow book mao ang mahitungod sa paghatag og Information Data Sheet (IDS), diin kini walay bayad ug ihatag sa mga myembro nga nanginahanglan para sa bunyag, kasal ug uban pa. Nasayran nga adunay nagkalain-laing pamaagi ang mga PSK kung giunsa pag implementar ang maong IDS. Ang kasagarang obserbasyon nga moadto lamang sa Kasaulogan ang miyembro kung adunay panginahanglan sama sa IDS.

Pagkahuman sa mga kulokabildo mihatag og mensahe si Fr. Pete Lamata mahitungod sa iyang obserbasyon ug kasinatian sa laing parokya. Ang mga partisipante mihatag pud sa ilahang mga nasinati diha sa maong activity. Adunay nag ingon: “na refresh, na review, enlightened, empowered, answered clarifications” ug uban pa.

Gihuman ang maong kalihukan pinaagi sa Closing Remarks ug Final Blessing ni Fr. Dionisio Tabiliran. (Arsenia P. Barimbao, PSK Parish Coordinator | Photos by Hermie Mapute)