ANC sa Davao Gilunsad

Niining tuig sa mga layko gilunsad ang Archdiocesan Nutrition Center sa Davao pinaagi sa Misa ug Blessing nga gipangulohan ni Arsobispo Romulo G. Vallles niadtong Mayo 19, alas 9:00 sa buntag.

Nahimutang sa Pag-asa Street, Fatima, Davao City, gihimo ni Mayor Rodrigo Duterte ug Mr. and Mrs. Willie ug Carie Ho sa HR Construction Corporation, ang miabaga sa pagtukod sa maong gambalay, ang pagputol sa ribbon.

Sa inisyatibo sa Archdiiocesan Council for Lay Apostolate and Integrated Movements (ACLAIM) nga gitimonan ni Msgr. Paul  A. Cuison, ang Episcopal Vicar for the Laity, tumong sa maong sentro ang malukpanong programa sa pag-atiman sa mga kabus, sama sa espirituhanong pormasyon, medikal ug pagpakaon kanila.

Duna kiniy kapilya, kusina ug session hall aron maka-akomodar og mga usa ka gatos ka mga kabus matag sesyon. Duha ka higayon nakabisita dinhing lugara si Blessed Mother Teresa sa Calcutta kinsa nakadasig niining maong proyekto kay kanhi man kining balay alang sa mga edaran nga gialagaran kaniadto sa mga Missionaries of Charity.

Isip tubag sa hagit ni Santo Papa Francisco, naghiusa sa pagtambong sa pag-abli sa maong sentro ang mga representanteng mga layko gikan sa ACLAIM ug pipila ka mga pari sa Davao. (dcherald)