Wala Ko Mubiya

Dear Ate Emz,

Sa akong pangedaron nga 50 anyos, aktibo akong nagapangalagad sa simbahan. Dugay-dugay na sab ako sa akong mininstriyang gikalambigitan. Daghan nang mga katuigan ang milabay daghan na sab ang mga miapil ug wala milungtad, mihawa dili magdugay. Dunay kanya-kanyang rason nga balido ug ang uban murag kahibulungan. Nakapangutana ako ug nganong ang uban mulungtad man ug ang pipila dili ka lahutay. Dili ba kaha kulang pa ang pormasyon? Huyang ang pagtoo ug dili tinooray ang pagserbisyo? Apil-apil lang aron nga mahilambigit ug magpaka aron-ingnun?

Sa akong gidugayon sa pag-apil sa mga kalihukan diha sa pagserbisyo tinooray gayud ang akong tinguha aron nga mahilayo, dili mulihis sa hiwi nga dalan. Diversionary aron mahalikay sa dautan ug duol sa kaluwasan. Dili man sa ingon nga righteous apan naningkamot nga mamahimong angayan sa mata sa Dios Amahan. Ako maka ingon gayud nga daghan ang gitawag apan pipila lamang ang mitubag.

Sincerely,
Boggz

* * * * * *

Dear Boggz,

Daygon ug pasalamatan ang atong Ginoo nga usa ka sa mga milahutay sa pag-alagad sa Simbahan sulod sa daghang katuigan ug matinud-anon gihapon nga pagpangalagad!

Kung unsa kadaghan ang mga indibidwal nga nagserbisyo sa mga parokya, mao sab ang kadaghanon sa mga rason nganong molahutay sila (sama nimo), ug nganong ang uban dili molahutay. Luyo niining tanan ako nagtuo nga sila adunay maayo nga mga katuyoan sa pag-alagad sa Ginoo pinaagi sa ministriya nga ilang giapilan.

Naa koy kaila nga magtiayon nga pagkahuman sa ilang pag-apil sa Parish-sponsored Marriage Enrichment seminar, giimbitahan sila nga moapil sa Family and Life Apostolate. Nisugot sab sila. Naa sila’y mga regular meetings ug enrichment sessions, ug uban pang mga kalihukan alang sa mga pamilya sa ilang GKK ug mga kalihukan sa parokya mismo. Na busy na sila ug tungud niini, mas nidaghan ang oras nga nagahin sa ilang apostolado. Naapektuhan ang ilang panahon alang sa kaugalingong pamilya. Busa, tungod niini, nag lie low sila ug sa kadugayan, niundang ra gyud. Ang rason, gagmay pa man gud ilahang mga anak ug nanginahanglan sab kini sa ilahang pag-amuma.

Ang matag usa maglahi-lahi ang kinaiya busa, naay nagka lain-laing mga dynamics nga mahitabo sa mga miyembro dinha sa matag klase sa ministriya. Dili malikayan ang mga panaglalis ug dili pagsinabtanay, mao nga ang uban mohawa na lang sa grupo. Aduna usab uban nga sa ulahi makaamgo nga ang pagpangalagad sa Simbahan dili diay para kanila, o gibati nila nga dili sila mabungahon o dili malipayon sa pagserbisyo, busa, mao nga mobiya sab sila. Apan, alang sa uban, human sa pipila ka discernment process, nakaamgo nga ang atong Ginoo adunay laing mga plano alang kanila. Ug sa imong kahimtang, tingali ang Ginoo nagtawag gayud kanimo sa pag-alagad Kaniya diha sa imong ministriya karon.

Tingali, husto sab, nga usahay makahunahuna ug mahibulong ka… “ngano mobiya man sila? Kulang ba ang pormasyon? Huyang ang pagtuo? Dili tinooray ang pagserbisyo? Apil-apil lang aron nga mahilambigit ug magpaka aron-ingnun?” Sa pagkatinuod lang, wala gyud kitay full knowledge of what they have gone through or where they are coming from. Only God knows what’s in their hearts, hence, who are we to judge?

Ang matag usa adunay kaugalingong tawag o misyon sa kinabuhi. Ang matag usa naningkamot sa pagpangitag kahulogan/kabuluhan niini. Nagpadayon kita sa pagpangita kon asa kita gidala sa atong Ginoo, kung unsa nga dalan ang gusto Niya nga atong sundan, diin kita mas makahuluganong makaalagad Kaniya. Mao nga kinahanglan ta nga kanunay gyud mag-ampo dili lang alang sa atong kaugalingon, kondili alang usab sa uban aron ang tanan molahutay ug magpabiling committed kon asa kita Niya gitawag aron sa pag-alagad Kaniya.

Ang matag usa gitawag aron mahimong balaan, makaila, mahigugma ug mag-alagad sa Ginoo. Tingali kadtong mga niundang sa ilang pagpangalagad sa Parokya, sa kataposan nakakaplag sila diin ang Ginoo tinuod nga naggiya kanila. Busa, kung adunay mobiya, ubani lang sila sa imong mga pag-ampo tungod kay ang Ginoo adunay mas maayong mga plano alang kanila.

Sa imong bahin, sigurado ko nga daghan sab ang imong naagian nga mga pakigbisog ug pagsulay, apan milahutay ka, salamat sa Ginoo sa Iyang mga panalangin alang kanimo. Dili gyud sayon ang mangalagad Kaniya, apan dili sab gyud ka Niya pasagdan ug kanunay gyud Siyang magpabilin kanimo. Ayaw lang gyud pagbiya Kaniya.

Avoid the temptation to be self-righteous just because you have persevered till this time. Magmabinantayon sa mga manipulasyon sa yawa. Tungod kay alang niadtong mga nakatukod na ug mas lig-on nga relasyon sa Ginoo, ang yawa maningkamot gyud nga maputol kini.

Labaw sa tanan, hinumdumi kanunay nga magmapaubsanon sa pagalagad sa atong Ginoo ug Iyang katawhan. Instrumento lamang kita aron mapadayag og masinati sa uban ang Iyang gugma.

Padayon sa pag-ampo alang sa dugang nga mga indibidwal nga motubag sa pagdapit sa atong Ginoo sa pag-alagad Kaniya pinaagi sa lain-laing mga ministriya sa Simbahan.

Continue to glorify God by your life, accompanied by Mama Mary, our Lady of the way.

God bless you more.

Ate Emz