World Day for Grandparents and Elderly

“Ang iyang kalooy kay gikan sa edad hangtod sa edad.” (Lk 1:50)

Kudos sa Holy Family Parish sa Brgy. Dumoy-Baliok kauban ang FLA/PSKB/GSL sa maanindot ug makapatandog nga selebrasyon sa World Day for Grandparents and Elderly niadtong Dominggo, Hulyo 23. Tinuod nga ang kalooy sa Ginoo walay puas ug walay katapusan.

Gipahigayon ang pagbisita sa mga katigulangan sa ilang panimalay nga gipangunahan sa mga FLA ug ilang mga anak/PSKB/GSL. Lakip niini ang paghatag og mga bulak isip pagpaambit sa gugma ug pasalamat kanila sa kinabuhi nga gipaambit kanato sa Ginoo pinaagi kanila.

Ang selebrasyon gisugdan sa Santos nga Misa nga gipatigayon alang sa mga katigulangan. Pinaagi niini, napakita ang kaimportante sa mga katigulangan. Adunay pagpanghatag og bulak nga gipangunahan sa mga anak sa FLA ug PSKB kauban usab ang mga kabatan-onan. Aduna puy gipaambit nga lugaw ang mga sakop sa Knights of Columbus.

Dako gayod ang papel sa mga katigulangan kay sila man ang nagahatag ug gugma nga walay kondisyon nga makatabang kanato nga mubati ug luwas ug protektado. Ingon nila, “Kinahanglan usa ka baryo” aron mapadako ang usa ka bata ug dili kana binuang. Ang mga bata nanginahanglan og walay katapusan nga positibo nga impluwensya, gugma, emosyonal nga suporta ug lig-on nga mga sulondan sa ilang kinabuhi aron matabangan sila nga motubo ngadto sa maayo ug buotan nga tawo ug ang mga apohan ang magpaambit sa maong paglambo sa kinaiya. Angay lamang nga pasalamatan ang Ginoo sa gasa nga mao ang atong mga apohan.

Ang mga sakop sa FLA ug PSKB mapasalamaton sa mga mitabang aron mamahimong makahuluganon ang selebrasyon. Hinaot nga magpabilin unta ang paglihok sa tibuok espiritu kauban ang gugma ni Kristo aron padayon nga matuman ang misyon sa paghatag sa maayong balita sa kalibutan. (Zita Penafiel-Cayapos – FLA, Holy Family Parish, Baliok)