Wala mag-una nga pagmahay

Dear Ate Emz,

Sa akong pang-edaron karon nga 45 anyos, usa na ako ka lolo kay bag-ohay lang nanganak ang akong kamaguwangan.

Ipaambit ko lang ang akong kasinatian kaniadto nga sa dihang nakaluag-luag pa ako sa akong kahimtang. Duna akoy gamayng negosyo ug kining outlet sa Lotto. Kusog2x ang kita mao nga maka ingon gayud ako og abunda ang akong abot. Wala akoy control sa akong mga gustong maangkon kay lagi dunay ika gasto. Gisudlan ko sab ang paggamit sa droga, kahilayan akoa sab na agian. Na impluwensiyahan ako sa barkada nga way ayo. Puro gasto, inum, gimik, laag diri, laag didto, puro walay hinungdan. Hangtud nagkayamukat na ang among kahimtang. Gibulagan ako sa akong asawa ug mipauli ngadto sa ilang lugar dala ang akong duha ka anak. Hinoon gitugutan ako sa pagbisita kanila apan sa kalayo sa ilang dapit tagsa lang ako maka adto kanila. Na lusno sab hinay-hinay ang akong negosyo hangtud sa mahanaw gyud ang tanan kong gihaguan.

KARMA is real nag abot-abot ang dimalas sa akong kinabuhi. Ang pinaka pait pa gayud kay kining akong kamaguwangan na buros sa edad nga hasta pang bataa, 17 anyos ug nanganak na. Sakit kaayo sa akong buot. Mao na seguro ni ilang giingon nga mabaslan sa panahon. Dako kaayo ang akong pagmahay nga kaniadto anaa na unta ako sa peak sa akong kahimtang, akoa pa gayud gi usik-usikan. Wala gyuy mag una nga pagmahay.

Mao nga hangyo nako sa uban. Dili na nato paabuton nga mubuhat kita ug atong kamahayan puhon. Likay sa mga dautang buhat ug puyo sa matarong.

Nagmahay,
Matt

* * * * * *

Dear Matt,

Sumala sa usa ka panultihon, “wala gyud pagmahay nga mag-una”. Apan pasalamat gihapon sa Ginoo nalamdagan ka ug nakaamgo sa sangpotanan sa imong mga sayop nga mga buhat.

Sa tinuod lang naa gyud ang mga tentasyon ug kusog kaayo kini labi na kung daghan ka ug kwarta nga ikagasto sa mga bisyo ug uban pang dili maayo nga mga buhat. Una sa tanan, sama sa nahitabo, ang imong pamilya gyud ang mag-antus tungud niini, hangtud nga sa katapusan, mag-inusara ka na. Dili sab ikatingala kung ang imong anak nga babaye nangita og gugma ug pag-atiman gawas sa pamilya, modangop didto sa mga higala. Apan nakaplagan ang sayop nga matang sa gugma, nilihis sab ang dalan, ug namabdos sa bata pa kaayo nga edad. Syempre, tungud kulang sa presensya ug paggiya sa ginikanan mao nga mahisalaag ang anak. Tinuod, pait gyud kini alang sa usa ka ginikanan nga mahunong ang maayong kaugmaon sa anak llabi na kung kini “batang anak nga adunay anak”. Ug karon, imong naamgohan kung unsa ka importante ang responsibilidad sa mga ginikanan alang sa ilang mga anak ug labaw sa tanan, kung unsa ka importante ang pamilya!

Sa pagkakaron dili na nimo mabalik ang mga “kamot sa panahon”. Indeed God sometimes writes straight with crooked lines… to teach us a lesson, even if we learned in the most painful way. That is why in life there is always a second chance. Grab this second chance, but remember, you need to trust the power of God. Surrender your inadequacies to Him so that He can fill you with His strength.

Mahimong napandol ka ug natumba apan ang mas labing importante kay mubangon ka ug magsugod na usab ug bag-ong kinabuhi. Ang pagbasol sa sayop nga binuhatan maisip usab nga usa ka gasa gikan sa Ginoo. Apan kining mga pagbasol dili lang magpabilin dinha sa hunahuna. Ang tinuod nga paghinulsol kinahanglang ipakita ngadto sa mga maayong buhat. Pinaagi sa imong nabag-o nga kinabuhi, moabot ang panahon nga imong maangkon ang kapasayloan sa imong asawa ug pamilya, ug paglaum nga makig-uli kanila.

Nagtuo ako nga daghan pa gyud kang nakat-unan nga mga leksyon gikan ining imong kasinatian mao nga nakahukom ka nga ipaambit kini sa uban. Ang pagpaambit usa na kini ka positibong lakang nga imong nabuhat aron makakat-on sab sila. Nanghinaut ko nga sa pagpaambit sa imong kasinatian, mas gamay na lang ang mga tawo nga mahisalaag sa ilang paglawig aning dalan sa kinabuhi.

Atong hinumduman nga bisag unsa pa ang atong mga paningkamot nga modato, mogamhanan, modungganon, ug mosikat, kung ang atong Ginoo wala sa sentro niining tanan, walay hinungdan ang kinabuhi. Hinoon, kining tanang nga mga paningkamot ug mga tinguha kinahanglan nga modala kanato nga mas moduol sa atong Ginoo ug dili mahilayo Kaniya. Busa, sama sa imong gipadayag, “likay sa dautang buhat ug puyo sa matarong”. Apan unsaon ang pagbuhat niini?

Ang pulong sa Ginoo, ang Iyang mga sugo maoy sumbanan sa mga maayong buhat ug pagpuyo sa matarong. Nagpasalig Siya nga ang Iyang grasya igo na samtang ang tawo maningkamot sa pagsunod sa Iyang kabubut-on. Dili gyud ka Niya pasagdan basta magpabilin kang konektado Kaniya pinaagi sa kanunay nga pag-ampo. Ipaambit ang imong katakus pinaagi sa pag-alagad sa uban ug buhata kining tanan alang sa imong gugma ug alang sa kahimayaan sa atong Ginoo.

Padayon sa imong panaw sa kinabuhi ug pagtigum ug mga bahandi sa langit, uban sa imong mga maayong buhat.

God bless you more.
Ate Emz