Yellow Book Gituki sa VDLRP

Nakakaplag og kahayag ang tanang PSK, District ug Parish Coordinators sa gipahigayon nga “Revisitation on the Yellow Book” sa parokya sa Virgen delos Remedios Crossing Bayabas Toril kaniadtong Sabado Hulyo 1, 2023.

Ang maong kalihokan gisugdan sa pag-ampo sa Santos nga Rosaryo ug gisunod dayon ang pag-abi-abi sa kura paroko nga si Fr. Anthony Silvosa sa mga bisita nga sila si Fr. Pete Lamata ug Ms. Victoria Estoque, nga maoy gipadala sa Ginoo aron matuki, mapalapnag ug makumusta kung asang bahina sa Guidelines and Norms sa Yellow Book ang naimplementar sa 76 ka GKK nga sakop sa VDLRP.

Human na presentar kung asa na dapit ang napahigayon sa mga artikulo ug seksyon sa Yellow Book, nagpaambit ang mga GSL sa nagkalain-laing kasinatian sa matag katilingban kung diin sila nahisakop. Adunay sugyot ug mga nakutlo nga kasinatian nga naghatag usab ug bulawanong ideya kay Fr. Pete ug Ms. Vicky nga angayang ipaambit sa ubang parokya. Kay mao kini ang primerong higayon nga nagbisita sila ug nangumusta sa parokya nga sakop sa Arkidayosis sa Davao.

Kini ang pipila ka mga Guidelines and Norms nga natuki: una, tanang sakop sa katilingban nga binunyagan membro sa GKK. Dili angayan nga pangayuan ug membership fee kondili ang pagdawat sa halad pasalamat nga itunol sa membro. Ikaduha, pagpahinumdom sa tanang GSLs nga aduna kitay nagkadaiyang mga papel sa GKK ug angayan kining buhaton sa matag usa dili lamang usa ka GSL ang mobuhat niining tanan. Ikatulo, pinaagi sa pagpaubos ug pagpundar ug maayo ug Kristohanong relasyon sa mga silingan mapatuman ang territorial jurisdiction. Human sa mga pag-inambitay sa pulong nga nadungog sa mga bisita ug mga lideres sa VDLRP naghatag ug panapos nga mensahe si Fr. Silvosa alang sa tanan, nga isip binunyagan si Kristo mao ang atong ulo ug kita nga mga katawhan nga mao ang simbahan mao ang lawas. (Lilibeth Sancover | Virgen delos Remedios Parish SoCCom)