Birhen Maria: Modelo Sa Pagkamasinugtanon Ug Pagkapiniyalan

Birhen Maria: Modelo sa Katilingban sa Pagkamasinugtanon ug Pagkapiniyalan sa Dios Padulong ngadto sa Misyon sa Katawhan. Mao kini ang tema sa pagsaulog sa ika-29 nga kapistahan sa Gagmay’ng Kristohanong Katilingban (GKK) Our Mother of Perpetual Help, Villa Park Subd., Cabantian nga nahisakop sa Parokya sa St. Mary of the Perpetual Rosary, Buhangin.

Aron mahiusa ang katilingban sa pagsaulog sa kapistahan, gisugdan kini sa pagpangandam sa Hiniusang Pag-ampo (H.P.) ug Pag-Nobena sa Katilingban nga nagsugod sa Hunyo 3, 2023 matag alas 7:00 sa gabii hangtud Hunyo 11, 2023. Dugang pagpasabot sa mga GKK Servant Leaders (GSL) ug Miyembro sa Katilingban sa Our Mother of Perpetual Help mahitungod sa Pagkapiniyalan, adunay input on Stewardship nga gipahigayon pagkahuman sa H.P. Nobena niadtong Hunyo 8, 2023. Ang maong input gihatag sa Parish Formation Team nga sila Mrs. Lina Montilde ug Mrs. Nita Balio.

Ang Santos nga Misa sa kapistahan gisaulog niadtong Hunyo 12, 2023 sa alas 8:00 ang takna sa buntag sa maong kapilya diin gipangulohan kini sa Kura Paroko, Fr. Dionisio Tabiliran. Matod pa ni Fr. Diony nga angayan lang nga himoon nga sumbanan o modelo sa katilingban ang mga hiyas ni Birhen Maria, ang Inahan sa Kanunay’ng Panabang tungod kay andam ang Mahal nga Birhen motabang sa katawhan nga modangop sa iyang bugtong Anak nga si Hesus pinaagi sa iyang panabang.

Aron masinati ang kahiusahan sa mga miyembro sa katilingban, pagkahapon sa maong pagsaulog sa kapistahan adunay basketball championship nga gipahigayon ug parlor games alang sa mga kabataan diin malipayon ang mga niparticipar nga mga kabataan tungod kay adunay premyo nga ilang nadawat gikan sa mga manggihatagon ug piniyalan na mga miyembro sa katilingban.

Mapasalamatan ang matag-usa tungod nagmalampuson ang kasaulogan sa kapistahan sa Mahal nga Birhen: Inahan sa Kanunay’ng Panabang pinaagi sa pagtinabangay ug suporta sa mga GSL ug miyembro sa katilingban tungod sa maayong pagka piniyalan sa PSK.

VIVA MARIA!

(Hermelita Mapute, Parish SoCCom)