Mga Kamot nga Magdala kay Jesus Kanato

Ang Extraordinary Ministers of Holy Communion (EMHC) sa Our Lady of Miraculous Medal Parish (OLMMP) nagpahigayon sa ilang tinuig nga recollection didto sa Our Lady of Victory Resort Camudmud, Island Garden City of Samal, niadtong Hunyo 1-2, 2023. Kini nga recollection gihan-ay ni Bro. Pastor Mejos, OLMMP-Lay Minister Coordinator. Gilangkuban kini sa 39 ka partisipante gikan sa lain-laing GKK nga sakop sa parokya. Kini nga kalihokan nabahin sa duha ka sesyon nga naghisgot mahitungod sa Santos nga Misa, Yukaristiya ug Pag-ampo nga gihatag ni Roland Pardillo, usa ka PSL gikan sa Immaculate Conception Parish Peñaplata ug ang President sa Catholic Faith Defenders IGACOS. Nagpaambit sab si Rev. Fr. Jesus H. Samaniego, kura paroko dayon nagsaulog sa Santos nga Misa.

Niadtong Hunyo 11, 2023 dungan sa Solemnidad sa Lawas ug Dugo ni Kristo, gipahigayon ang pagpadala sa 39 ka Extraordinary Ministers human nila matuman ang mga panginahanglan ug mga obligasyon sa maong ministriya. Usa sa mga obligasyon mao ang Adoracion Nocturna nga gipahigayon niadtong Hunyo 10 sa alas 9 sa gabii hangtud alas 5 sa kadlawon.

Mapasalamaton ang mga parokyano sa tanang EMHC diha sa ilang pagpadayon sa paghalad sa ilang kaugalingon aron ang tanan makadawat sa lawas ug dugo ni Kristo, Jesus. (Clarine M. Paraiso)