Pagpabuhi sa Atong Pagtoo

(Homily of Most Rev. Romulo G. Valles, D.D., Archbishop of Davao during the 58th Parochial Fiesta of St. John the Baptist Parish, Lasang June 24, 2023.)

Atong nabati karon ang pulong sa Dios, mao manay importante sa Eucharist, sa katapusan atong dawaton si Jesus sa atong kaugalingon, sa pagkalawat sa iyang lawas ug dugo. Importante nga dinhi kita mukutlo, mukuha ug mga kamatuoran nga hambinon ining atong pagsaulog sa piyesta karon. Ang dakong tema, kalipay, pagpasalamat diha sa kinabuhi ni San Juan Bautista, pagsaulog nato karon sa iyang pagkatawo:

Unang kamatuoran, nga gipakita nga ang Dios, dunay plano alang kanato. “Didto palang ka sa tagoangkan sa imong inahan, gihinganlan ko na ikaw, gitawag ko na ikaw.” Dili lang na alang kang San Juan Bautista, kining maong kamatuoran gikan sa Santos nga Bibliya, kamatuoran ni alang nato. Sa ato pa, dili kita gipasagdan, sukad pa sa pagtisok nato in the moment of conception, pagpanamkon nato gitan-aw kita sa Dios…duna na siya’y tawag alang kanato. Busa, maayo karong adlawa sa atong piyesta, mopalandong kita kung giunsa nato paggunit, pagmahal ug makanunayon nga relfection, unsa may tawag sa Dios alang kanato?

Ika-duha nga kamatuoran ang paagi sa Dios makakurat, di nato mapaabot, sukwahi sa atong expectation busa nag require kini sa lalom nga pagtoo nga kung maabot kining higayona andam kitang mu surrender sa Dios og mutoman sa buot nga ipabuhat kanato. Bantayan ninyo nga ang ginikanan ni San Juan Bautista, si Zakarias, ug si Isabel mga buotan sila, in fact si Zakarias, pari sa templo, gani pagpahibalo sa anghel kaniya, nagserve siya sa templo. Ika-duha sila, tigulang na, as far as I know, wa silay complain, midawat lang sila nga di na sila manganak. Sa ato pa, kuan sila, walay reklamo sa Dios, gidawat lang nila ilang palad nga di na manganak si Isabel kay advanced in age na, mga tigulang na. Apan sa dihang gitugot sa Dios nga ipanganak si San Juan Bautista diha kang Isabel ug Zakarias, nabungkag ang ilang plano. Pero ang paagi sa Dios, dili paagi sa tawo, God’s ways are not man’s ways busa kung maabot kining design sa Ginoo, kining plano sa Ginoo nga medyo dili sibo sa atoa, unya dili kaayo ta abli. Busa ang ika-duha nga hagit sa atong piyesta karon aron malig-on ang atong pagtoo, kanunay ba natong gi-evaluate, kanunay ba natong gisusi ang atong kaugalingon, unsa kita kaabli sa hagit sa Ginoo bisan pa ang mga hagit, dili klaro sa atong kinabuhi apan, “yes, Ginoo imo kining ipabuhat kanamo.”

Ika-tulo nga leksyon alang sa pagpabuhi sa atong pagtoo mao nga si San Juan Bautista may misyon, may misyon siya sa iyang kinabuhi. Unya sa dihang nagtubo na siya, ang iyang lihok, grabe kaayo ang iyang pagtuman, pagkinabuhi sa iyang misyon. Gani ang mga tawo nagtuo nga siya na ang mesiyas. Unya ingon siya, “dili pa ako, ang Ginoo magsunod kanako, siya ang akong gisangyaw kaninyo.” Kanindot ba kaha, nga kon ang atong mga silingan, ang atong mga kauban, pagkakita sa mga tawo sa atong kinabuhi, bisan sa hilom lang ang naglibot kanimo muingon nga, “mabati man nako nga naa ang Espiritu kaniya, Kristohanon kaayo ang iyang dating, ang iyang aura, ang iyang baho, ang iyang tono, ang iyang lihok, makahinumdom ko nga naa diay Ginoo sa atong kinabuhi.”

Busa mga igsoon, sa tulo ka punto, ayaw kalimot, salig gayod, kay sukad pa sa pagpanamkon kanato, gitan-aw na kita sa Dios, gitawag na kita sa Dios, duna nay plano ang Dios kanato, sukad pa sa pagpanamkon kanato, that is very reassuring nga ihap nata sa Ginoo. Kung ang Ginoo musugat, mukuhit kanato sa kinabuhi kini dili kaayo sayon sabton, medyo gani supak sa atong pagkwenta sa kinabuhi busa ika-duhang hagit, abli ba kita, masaligon ba kitang mudawat, mutuman sa hagit sa Dios. Ika-tulo, ang hagit nga unta sa atong kinabuhi, ang atong mga silingan naglibot kanato ma inspired sila, madani sila sa pagka bootan sa atong kinabuhi, sa pagkadiosnon sa atong kinabuhi, they are inspired to be good because we are good, they are inspired to be merciful because we are merciful and ma inspire sila sa atong pagkamasaligon sa Dios tungod sa imong pagkamasaligon sa Ginoo.