Anibersaryo sa Kagawasan

Nagkatigom sulod sa Santos nga Misa ang mga opisyales ug mga functionaries sa duha ka barangay, Bgry. Dumoy ug Barangay Baliok nga nahisakop sa Parokya sa Sagrada Pamilya niadtong Hunyo 12 alang sa pagsaulog sa ika-125 ka tuig nga anibersaryo sa Adlaw sa Kagawasan (Independence Day).

Sa maong misa nga gipangulohan ni Fr. Roger “Jing” Duhaylungsod, iyang gipadayag nga kitang tanang mga Pilipino angay nga magpakita ug pagmahal sa atong nasud. Iya pang gidugang nga kitang mga hamtong magpakita ug maayong kinaiya ug binuhatan alang sa kaayuhan sa atong nasod. Ang mga kabataan nanginahanglan ug panag-ingnan aron mapadayon ang maayong pamatasan sa mga Pilipino. Siya usab nagpahinumdom nga walay laing magmahal sa atong nasod kon dili kita ra gayod nga mga Pilipino ug siya nanghinaot nga magpadayon ang diwa sa kagawasan sa nasud mga walay bisan kinsa nga modikta ug muyatak sa atong katungod.

Matod pa ni Fr. Jing, nga angay gayud pasidunggan ug handumon ang mga bayani sama nila Jose Rizal, Andres Bonifacio ug uban pa nga naghatag sa ilang kaugalingon aron maangkon sa nasud ang kagawasan. Sama sa atong mga bayani, kita usab nga mga katawhan andam mutahan sa kaugalingon alang sa kaayuhan sa atong nasod. (Flor Arellano-Deloria | Holy Family Parish SoCCom)