Santa Maria: Hulagway sa Barangay nga Nagkahiusa

Matag tuig gisaulog ang kapistahan sa Birhen sa Barangay, ang mahal nga patrona sa sona 7 nga nahisakop sa St. Mary of the Perpetual Rosary Parish.

Mapasalamaton ang mga GKK Servant Leaders (GSLs) ug miyembro sa unom (6) ka mga GKK nga gilangkuban sa San Vicente Ferrer, Balite Buhangin; Mother of Perpetual Help, Panorama/Robinsons; Christ the King, Bread Village; Immaculada Conception, Lower Bread Village; Sto. Niño, Pioneer Hills, Buhangin og San Roque, Engan Village nga human sa pandemya nagpadayon sa pagsaulog sa ika-lima (5) ka tuig nga kapistahan sa Birhen sa Barangay niadtong Mayo 27, 2023 diin gipahigayon ang Santos nga Misa sa host chapel, San Vicente Ferrer, Balite sa alas 5:00 ang takna sa hapon nga gipangulohan sa kura paroko, Rev. Fr. Dionisio C. Tabiliran.

Nagsugod ang nobena niadtong Mayo 18, 2023 sa alas 6:00 ang takna sa gabii, nagka lain-laing GKK nga miyembro sa maong sona ang nangulo kada gabii sa pagpangandam sa nobena ug uban pang gimbuhaton.

Sa ika-9 ka adlaw, gihimo ang prosisyon/caravan sa rota sa unom (6) ka mga GKK lakip ang parokya.

Luyo sa di maayong panahon kada gabii sa nobena daghan gihapon ang mitambong. Mawala ang kaluya tungod kay nagkahiusa ang tanan sa pagtuo kang Santa Maria, ang Inahan sa kalig-on ug gugma. Sa pagpanguli adunay mopaambit sa sakyanan ug mangunay sa paghatod sa tagsa-tagsa ka panimalay mao hapsay ang dagan sa kalihokan kay ang katawhan mipaambit sa ilang gasa sa panahon, talento ug bahandi.

Tukma gayod sa katilingban ang gihimong tema nga nagkanayon: “Birhen sa Barangay, Ehemplo sa Kalig-on sa Pagka Manggihatagon nga Puno sa Gugma ug Pag-amoma sa Uban”. Mao kini timailhan nga lig-on na ang pagtuo ug debosyon kang Santa Maria, ang atong Inahan nga maoy kahiusahan sa gugma ug giya padulong sa iyang anak nga si Jesukristo, ang atong manluluwas.

Matod pa ni Fr. Diony, si Santa Maria usa ka hulagway diha sa barangay nga nagkahiusa diha sa pag-ampo, sa pagdayeg ug pagpasalamat ngadto sa atong langitnong Amahan.

Viva Jesus!, Viva Maria!

(Clinita Nartea | St. Mary of the Perpetual Rosary Parish – GKK SoCCom)