51 Ka tuig nga pag-amuma

Ang Our Mother of Perpetual Help Parish nagsaulog sa ilang ika singkwentay uno nga Parochial Fiesta miaging Hunyo 18, 2023 uban ang tema nga “Gratitude, Generosity and Genuine Mission”.

Daghang kalihokan ang nahitabo panahon sa piyesta. Ang mga Novena Mass nagsugod niadtong Hunyo nwebe hangtod sa disi-syete, sa alas sais sa buntag (English Mass) ug alas singko y medya sa hapon (Cebuano Mass) diin dunay mga sponsor nga gikan sa kada sona ug mga ministriya.

Pagka Hunyo 17, adlawng Sabado sa alas kwatro sa kadlawon, adunay prosisyon nga nahitabo o “AURORA” para sa Decor Saints. Ang rota nagsugod gkan sa parokya padulong sa Flyover Milan, Santol Street Buhangin, SPMC Bajada ug pabalik sa parokya. Paghuman sa prosisyon, nagsugod ang misa sa ika 9 nga adlaw sa novena.

Hunyo 18, adlawng Dominggo, sa alas dyes gisaulog ang Pontifical Mass nga gipangunahan ni Most Rev. George Rimando D.D. Auxilliary Bishop sa Davao City. Sulod sa misa nakita ang presensya sa atong mga kaigsuonan nga dunay kalisod sa pagdungog, ug diha sa matag bahin sa Santos nga Misa dunay mangulo sa pagsign sa atubangan aron masabtan ang liturhiya. Gikan pa sa kaniadto, duna na gyuy naka tagana nga misa duyog kining mga dunay hearing impairment. Kini nga lakang ehemplo gayod sa pagkapiniyalan.

Sa alas tres nga Misa, gipadala ang treinta’y-dos ka mga PSL.

Ug ang kinabibohan nga bahin sa kapistahan mao ang Parish Fiesta Celebration nga nahitabo pagkahapon sa alas kwatro didto sa SATMI Gymnasium. Gisugdan una ang registration ug giunahan dayon ug padula para sa pagpaabot sa ubang partisipante. Unang nagwelcome mao ang Parish Pastoral Council President nga si Mr. Edwin Pilapil. Gisunod dayon ang rollcall sa matag sona o mga ministriya dayon gisunod ang unang batch sa presentasyon.

Human sa unang batch, gisunod ang salu-salo. Paghuman sa panihapon, misunod dayon ang ikaduhang batch sa presentasyon. Adunay mga door prizes nga gipanghatag sa mga nagparehistro. Matud pa ni Fr. Gary Alvarado, priest in-charge nga giawhag niya ang tanan sa pagpadayon sa pagserbisyo sa katilingban. Human sa mubong mensahe, gipabalik ug presenta ang mga nakadaog sa Ethnic ug K-POP Dance Champion sa Zone 4 ug uban pang placer niadtong miaging Redemptorist Youth Ministry (RYM) Youth day.

Gipahibalo dayon ang mga midaog sa Family Urban Gardening. Ang champion mao si Jocelyn Gutierrez, 1st place Crescencia Lazaga, 2nd place Angelina Hontarosas ug uban pa.

Sa closing remarks ni Fr. Cruzito Manding (Redemptorist Rector) nagawhag sa tanan nga suportahan, pakusgon, palig-onon ang paghulma sa mga batan-on. Ug giawhag nya ang katawhan nga mananom pa para sa kinaiyahan. Nagmalapuson ang maong kasaulogan tungod sa mga tawong nagpaluyo niini uban sa atong LGU, pwersa sa kapulisan para sa hapsay nga selebrasyon, uban ang kinatibuk-an nga mga parokyano sa Redemptorist Community nga way puas sa pagsuporta kanunay sa kalihokan sa simbahan. (Mary Grace P. Gonzales | Our Mother of Perpetual Help Parish – GKK SoCCom)