Hamiling Kasingkasing ni Jesus: Kalig-on sa Pamilyang Piniyalan

Gisaulog sa Sacred Heart of Jesus Parish sa Obrero, Davao City ang 54th Parochial Fiesta niadtong Hunyo 16, 2023. Nahimong malampuson ang gipahigayong mga kalihokan isip sugat sa kapiyestahan ug sa mismong adlaw sa piyesta. Nilangkuban sa tibook komitiba sa Parish Pastoral Council (PPC) ang pagpangandam ug mga gimbuhaton aron mapalawig ang maayong balita pinaagi sa pagsaulog sa solemnidad sa Hamiling Kasingkasing ni Jesus. Karong tuiga, ang tema nagsentro sa pamilyag piniyalan ubos sa Parokya sa Hamiling Kasingkasing ni Jesus (Sacred Heart of Jesus Parish). Ang han-ay sa kapiyestahan adunay mga preparasyon sama sa nobena sa Hamiling Kasingkasing ni Jesus, fiesta day masses, Family Fiesta Fun run, Family Bazaar, ug and Fiesta Family Night ’23.

Una sa mga kalihokan mao ang Fiesta Bazaar na gisugdan niadtong Hunyo 4, 2023. Duha kini ka Dominggo nga gipahigayon sa parish ground. Gisalmotan kini sa nagkalain-laing minstriya apil ang tanang GKK sakop sa Sacred Heart of Jesus Parish. Nagkalain-laing produkto ang anaa sa bazaar sama sa mga bisti, pagkaon, dulaan, tanom, ug uban pa. Si Sis. Charita Puentespina, miyembro sa PPC Finance Committee ang naghatag og ideya nga magpahigayon og bazaar isip tabang sa mga small-scaled entrepreneurs nga sakop sa Gagmayng Kristohanong Katilingban (GKK). Ang dugang tumong usab niini mao nga mapakaylap ngadto sa matag miyebro nga sakop sa GKK, ministriya, ug organisasyon sulod sa simbahan ang kabililhon sa pagkapiniyalan sa bahandi. Dakong kalipay ang nasinati ni Sis Puentespina sa nagmalampusong Fiesta Bazaar tungod kay daghan ang nag-apil ug daghan usab ang namalit. Gipakita sa maong bazaar ang konsepto sa pagkapiniyalan kung diin adunay pagpaambit sa matag abot sa maong nahimong patigayon.

Sunod sa lista sa maong preparasyon padulong sa kapiyestahan sa Hamiling Kasingkasing ni Jesus mao ang 3K ug 5K Fun run ubos sa temang “Dagan alay sa Sacred Heart” nga gipahigayon sa NCCC Mall Victoria Plaza niadtong Hunyo 12, 2023 atol sa ika 125th nga kasumaran sa Adlaw sa Kagawasan sa atong nasod Pilipinas. Gisalmutan kini sa dul-an 700 ka mga indibidwal. Wala magdahom ang nangulo niini nga parte sa mga kalihokan nga moabot ug 700 ka mananagan. Sa original nga plano, 500 lamang ka mananagan ang gitan-aw nga musalmot tungod sa hamubong panahon alang sa preparasyon ug gilayong kalingawan lamang para sa mga parokyano. Ang tumong sa funrun mao ang pagimbita og mga deboto ug magdani og mga manimba alang sa kaluwasan. Ang nagkahiusang tabang sa tibuok ginsakupan sa Sacred Heart of Jesus Parish kauban sa pagampo mao ang nakaingon nga nahimo kining malampuson. Si Sis Leilani Diaz, pangulo sa maong kalihukan ang wala magdahom sa resulta sa mga registration forms na naapod-apod. Dakong pasalamat usab sa komitiba sa fun run, sa mga nagmanggihatagon, sa organizer, ug sa nagkonsepto niini nga klase nga katikaran, mga miyembro sa nagkalain-laing ministriya ug organisasyon sa Sacred Heart of Jesus Parish uban ang GKK.

Ang nuwebe ka adlaw sa nobena sa Hamiling Kasingkasing ni Jesus gihatagan usab og importansya. Gani kini ang usa sa pinakaimportante nga bahin sa kapiyestahan nga nagsugod Hunyo 7 hangtod Hunyo 15, 2023. Adunay mga misa nga gipangulohan sa mga imbitadong pari gikan sa seminaryo, Archdiocesan Commission on Social Communications, religious priests, kanhi ug kasamtangang Kura Paruko sa Sacred Heart of Jesus Parish.

Ang mga nangulo sa pagampo sa nobena mao ang mga miyembro gikan sa ministriya, mandatong organisasyon sa Sacred Heart, ug GKK Leaders. Labawng mapasalamaton si Sis Charita Puentespina, usa sa mga prayer leaders sa nobena sa Hamiling Kasingkasing ni Jesus tungod kay nahimo siyang kabahin na maampo ang maong nobena. Sumpay sa pagsaulog sa kapiyestahan mao ang pagpangandam sa mga nahan-ay nga fiesta masses sa Hunyo 16, 2023, adlaw sa kapiyestahan. Upat ka misa ang napahigayon ug gipangulohan kini nila Rev. Msgr. Edgar Labagala (6AM Mass), Most Rev. Leopoldo Jaucian, DD, Bishop of Bangued (9AM-Chinese Mass), Most Rev. George Rimando, DD, Auxiliary Bishop of Davao, ug si Rev. Fr. Emmanuel “Bong” Gonzaga, kura paruko (5:30PM). Daghan usab ang mga kaparian ang nagconcelebrate alang sa mga grasya ug panalangin sa mga ginsakupan ug mga parokyano sa Sacred Heart of Jesus Parish.

Sa homiliya ni Bp. Jaucian iyang gipadayag na ang Hamiling Kasingkasing ni Jesus mao ang gugma sa Dios kanatong tanan. Usab sa homiliya ni Bp. Rimando atol sa Pontifical Mass, siya nagpahinumdom nga ang Sagradong Kasingkasng ni Jesus nagsalamin sa maluluy-ong gugma sa Dios. Dili usab layo sa homiliya ni Rev. Msgr. Labagala nga nagpahinumdom nga maghigugmaay ang matag-usa. Sa laing bahin, ang gipaambit ni Rev. Fr. Bong Gonzaga, kura paruko, nagsentro sa pagkapiniyalan alang sa gingharian sa Ginoo.

Ang Family Fiesta Night 2023 mao ang pinakulahi nga panghitabo isip pagtapos sa ika-54 nga Kapiyestahan sa Sacred Heart of Jesus Parish ubos sa konseptong Pista sa Nayon. Kini nga pasundayag gipangulohan sa Parish Youth Apostolate sa Parokya sa Sacred Heart ubos sa pagpangulo ni Bro. Dexter Guardiano kauban si Sis Justine Kaye Delgado. Ang maong pasundayag adunay pagpasabot sa upat ka kinauyukang tinguha sa pagkapiniyalan: pagkaila, gugma, pagsalig, ug pagpasalamat. Sa mensahe ni Bro. Henry L. Evangelista, PPC coordinator siya nagkanayon “ang maayong pagkapiniyalan mamahimong hingpit kung nakasentro kita sa Hamiling Kasingkasing ni Jesus, ug ang usa nga hagit kanato isip mga piniyalan kinahanglan mamahimo kitang tanan nga maayong piniyalan sa atong pamilya.” Ang mga presentasyon giapilan sa mga grupo sa Pangulo sa Katilingban (PSK), Divine Mercy Apostolate, Mother Butler, Aurora Group kauban si Rev. Fr. Joseph Manga, Spiritan Priest, Parish Youth Apostolate, Catholic Women’s League, Pangulo sa Liturhiya, Lectors and Commentators Ministry, Parish Bible Apostolate, Pangulo sa Alagad, Gagmayng Kristohanong Katilingban, Brgy 18-B, ug ang Knights of the Altar’s Servers. Sadya kaayo ang maong selebrasyon tungod ang tanang mga miyembro sa organisasyon, ministriya ug GKK sa Parokya nagkatapok ug naginambitay sa mga pagkaong dala aron saluhan sa tanan.

Ang tema karong tuiga nga “Hamiling Kasingkasing ni Hesus: Kalig-on sa Pamilyang Piniyalan,” nagtutok sa debosyon sa pamilya sa Kasingkasing ni Hesus. Sa atong paghinumdom sa kalim-an ug upat ka tuig sa pagka-parokya, isip usa ka komunidad, atong tan-awon ang pamilya isip uyok ug sentro sa atong pagtuo isip usa ka simbahan. Ang pamilya mao ang ‘binhian sa bokasyon.’ Himoa nga ang debosyon sa Sagrado nga Kasingkasing ni Jesus mahimong kahayag ngadto sa kalamboan ug mabungahon nga pagtubo sa pamilya. Nga ang Kristohanong pagtuo ug tradisyon tipigan sa labing sukaranang sinugdanan sa katilingban.

Hinaot nga ang Sagrado nga Kasingkasing ni Jesus modan-ag kanato sa kaluoy ug modan-ag alang sa dugang nga mga tuig sa mabungahon nga pagtuo nga moabot. Isip usa ka parokya, isip usa ka komunidad. Malipayon nga 54th Parochial Fiesta! (Gresiel E. Ferrando | Sacred Heart of Jesus Parish – SocCom)