Kahiusahan sa Pagserbisyo sa Parokya

Nagpahigayon og Team Building Activity ang San Francisco de Asis Parish Tagakpan niadtong Hunyo 11 hangtod June 12, 2023 sa Dhen Yo’s Place, Kapatagan, Digos City. Ang maong aktibidades gisalmutan sa mga miyembro sa Parish Executive Committee (EXECOM), Parish Pastoral Council (PPC), mga Pangulo sa Katilingban (PSK) ug mga ministry leaders and coordinators sa Parokya.

Sa team building, gi-grupo ang mga ministriya ug mga GKK leaders aron pagsalmot sa mga padula ug mga group dynamics. Tumong sa maong team building activity nga mapakusgan ang koneksyon sa mga lideres sa GKK ug sa mga ministriya sa parokya aron mas mahapsay ang ilang pagpangalagad sa parokya ug ma-promote ang camaraderie ug koneksyon nila sa usa’g usa.

Matud pa ni Rev. Euricho Raphael Maralit, OSJ, usa sa mga facilitators sa team building, importante ang pagpahigayon og team building activity sa mga lideres sa parokya kay diha nila makita ang kabililhon sa pagpaminaw, pagkahiusa, ug pagtinabangay aron mahimong malampuson ug malungtaron ang ilang mga tinguha ug plano sa ilang tagsa-tagsa ka mga GKK ug mga ministriya.

Gidugang pud ni Fr. Mario B. Holmina, OSJ, kura paroko sa San Francisco de Asis Parish, nga ang team building makatabang dili lang sa pagpakusog sa koneksyon sa usa’g usa, apan apil na usab ang pagpakusog sa ilang koneksyon sa Ginoo, tungod kay nagkahiusa man ang tanan diha sa pagpangalagad sa kalambuan sa pagtoong Kristohanon sa mga parokyano.

Gitapos ang team building activity pinaagi sa pagsaulog sa Santos nga Misa. Nagalaom ug naga-ampo ang tanan nga ilang mapuy-an ang ilang mga naamgo ug nakat-onan sa duha ka adlaw nga team building activity. (SFDA Parish SoCCom)