Guilty Ko

Dear Ate Emz,

A blessed day sa tanan. Ang akong ipaambit nga kasinatian sigurado ako nga kasinatian sab sa uban.

Aduna akoy higala ug kauban sa trabaho kaniadto. Wala na hinoon kini siya ug mihawa na. Ipaambit ko lang kay na konsensiya ako tungod nasayud ako sa iyang gibuhat apan wala man lang akoy gihimo nga lakang aron dili na niya himoon.

Duna man gud kini siyay gikapungtan nga kauban ra sab namo sa trabaho. Hinoon lahi ang among departamento apan usa ra mi ka kumpanyang gina trabahoan. Kining akong kauban nga dunay gikapungtan, iyang giangkon kanako nga duna siya’y gihimo nga maka daot sa ekipo ug aron sa pag-puli sa trabahante nga maoy iyang gikapungtan og maoy mapasanginlan o kung dili man siya ang manubag tungod anaa sa iyang hour shift nahitabo ang pagkadaot.

Nasabtan nako siya ug ngano kini niya gibuhat kay tungod duna siya’y ka pungot niining tawhana apan ang kamatuoran, kining akong higala nga napungot niadtong kauban sa trabaho, tungod ra pud sa iyang binuhatan.

Abandoning the post ang hinungdan. Binuhatan kini sa akong higala unya mipadayag lang kining kauban sa trabaho nga dili maayo ang iyang ginabuhat mao nga kining akong higala napungot ngadto sa kauban sa trabaho.

Maayo na lang ug wala kini siya gisumbong sa management nga aron tagaan ug disciplinary action, gipakahilom na lang kini.

Sa ako sab kabahin nga nasayod ako niiini, wala man lang akoy gihimo aron mapugngan kini.

Hinoon mi resign na kining akong higala, nauna ang iyang gikapungtan. Ang ako lang nga dili na unta mausab ang mga panghitabo o kung duna man galing panghitabo sama sa ingon unta duna na akoy igong kusog sa pagpugong.

Nagmahay,
Jerome

* * * * * *

Dear Jerome,

Sa pagka tinuod lang, dili ka makalikay sa imong konsensya.

Kining gamay nga tingog sa imong hunahuna ang naghunghong o nagpahinumdom kanimo nga nakahimo ka og sayop nga tingali wala nimo tagda o imong gisalikway. Apan kini magpadayon sa pag samok-samok kanimo hangtod nga imong magtagad kiini. Nagatuo ako nga kini ang imong nasinati.

Kini nagpahinumdom sa usa ka pag-ampo nga atong ginasulti sa unang bahin sa Santos nga Misa. Mahimong wala kaayo kita maghunahuna niini, but we ask for forgiveness for our faults, for the things we have done wrong and for those WE FAILED TO DO…

Ang angay unta natong buhaton apan napakyas sa pagbuhat mao ang gikonsiderar nga SIN OF OMISSION.

Husto ka, daghan kanato ang guilty niini. Unsa kaha ang rason sa kapakyas sa pagbuhat sa angay buhaton? Sama nimo, usahay magpugong kita sa atong kaugalingon kay mahadlok kita sa resulta. Usahay kita pa ang mogawas nga dautan, sama sa nahitabo sa imong higala kadtong gi-remind siya nga “abandoning his post”. Ang pag-remind nakapasuko kaniya mao nga gusto niya nga manimalos pinaagi sa pagsulay nga gub-on ang kagamitan aron kining iyang gikasuk-an mabasol ug mahatagan sa kinahanglan nga aksyong pagdisiplina.

Ang imong napakyas sa buhat mao ang pagpugong sa imong higala sa pagpadayon sa iyang dautang plano. Apan nabuntog ka sa imong kahadlok tungod kay basig ikaw na sab ang pahimungtan niya. You save your own skin, so to say.

Ang pagbuhat sa fraternal correction, naglambigit ug risgo, ug usahay dili nato gusto nga mag take anang risgo tungod kay usahay sakit ang result ug dili kita ganahan nga masakitan.

Hinuon, ang Ginoo dili gayud mapakyas sa paghikap kanato aron kita makaayo sa atong mga sayop nga binuhatan ug makapabalik kanato sa husto nga dalan. Sa pagkatinuod lang, ang usa ka indibidwal nakakat-on sa kasinatian, mao nga kita moingon nga ang kasinatian mao ang labing maayo nga magtutudlo.

Nakakat-on ka pag-ayo sa imong leksyon. Makabaton ka pa ug dugang nga mga oportunidad sa pagtul-id sa imong mga sayop nga binuhatan or sa mga DILI NABUHAT NGA ANGAY’NG BUHATON. Kinahanglan gyud ang hingpit nga pagpaubos ug kaisog aron molapas ka sa imong comfort zone ug buhaton ang kinahanglang buhaton.

Dugang pa niini, ang atong Ginoo magpadala pa gyud kanimo ug dugang nga mga pagsulay ug mga okasyon aron ikaw makahimo sa pag-ugmad sa gikinahanglan nga kusog sa pagbuhat kon unsa ang hugot ug tukma (right and proper). Bisan pa niana, aron mahimo kini, hinumdomi nga ang pagampo mao lamang ang imong kusog. Busa, kini usab ang kinahanglan nimo nga amumahon sa imong kinabuhi.

In prayer, the Holy Spirit will enlighten you, grant you the gift of wisdom to make the right decisions to do what needs to be done. If God is with you, there is nothing to fear.

God bless you more,
Ate Emz