Youth Day 2023 Hugyaw

Ang Redemptorist Youth Mission (RYM Davao) ginasaulog ang tinuig nga selebrasyon bago ang Piyesta sa parokya sa Inahan sa Kanunayng Panabang uban ang tema nga “Panagtapok, Panaghiusa sa mga kabatan-onan isip mga piniyalan sa atong katilingban.” 560 ka mga batan-on ang aktibong misalmot sa kalihukan atol sa RYM Youth Day 2023 niadtong Sabado, Hunyo 10, 2023 sa SATMI Gym sulod sa Our Mother of Perpetual Help Parish. Kini ang adlaw sa mga kabatan-onan nga gikan sa lain-laing sona nga ang tumong mao ang pagpakita sa ilang talento ug pagkamamugnaon sa lain-laing aspeto, pagpalalom sa kaalam sa pagtoo nga madasig ang mga batan-on nga muhatag ug higayon diha sa pagtubo sa espirituhanong kalihukan sa simbahan.

Usa ka adlaw nga aktibidades ang giandam sa Local Coordinating Team ug tungod sa dili malikayan nga sirkumstansiya, nahimong nagsugod gikan sa alas 7 sa buntag ug nahuman kini hantud sa alas dose y medya sa kadlawon.

Gisugdan ang morning session sa alas syete sa buntag sa pagparehistro sa mga partisipante, dayon gisunod ang mga aktibidades nga Parade of Colors, Cheers and Yells Showdown, Dulang Inato, Phone Photography, Quiz Bee ug Postermaking. Aduna sab inputs mahitungod sa mental health, climate change ug gender equality. Gisugdan ang afternoon session sa ala una sa hapon pinaagi sa Santos nga Misa dayon gisunod ang K-POP dance, cheers and yells contest ug ang throwback video phone photograph. Human sa panihapon, gisugdan ang evening session ug opening salvo sa mga kandidato ug kandidata sa Mr. & Ms. RYM production number. Gisingit ang cultural dance presentation kada sona sa matag bahin sa Mr.& Ms. RYM. Ang labing gipaabot sa tanan mao ang paghatag sa mga awards ug certificates sa mga nakadaog. Ang over-all champion nga sona mao ang RYM Zone 4.

Nalipay ang mga Local Coordinating Team ilabina ang OIC sa parokya nga si Rev. Fr. Gary Alvarado, CSsR sa tanang mga batan-on nga migahin sa ilang panahon sa pag-apil sa maong kalihokan. (Mary Grace Gonzales | OMPH Parish Soccom)